Ózbekstan, Qyrǵyzstan, Tájikstan jáne Qazaqstan tarihi-mádeni eskertkishterin Dúniejúzilik muralar tizimine kirgizý úshin birlesip áreket etip jatyr. Bul týraly QR Mádeniet jáne sport ministri Aqtoty Raiymqulova aitty, dep habarlaidy QazAqparat.
«Qazirgi ýaqytta Ózbekstan, Qyrǵyzstan jáne Tájikstan elderimen birlesip, Qazaqstannyń biregei tarihi jáne mádeni eskertkishterin dúniejúzilik muralar tizimine engizý úshin «Uly Jibek joly-Ferǵana-Syrdariia dálizi» atty transulttyq nominatsiiasyn ilgeriletý boiynsha nominatsiialyq qujattamany daiyndaý jumystary júrip jatyr», - dedi ministr ortalyq kommýnikatsiialar qyzmetinde ótken brifingide.
Onyń sózine qaraǵanda, atalmysh qujat qabyldansa Qazaqstan aýmaǵyndaǵy 6 iri nysan osy tizimge qosylýy kerek.
«Qazaqstan aýmaǵyna Saýran, Jetiasar, Jankent, Syǵanaq, Otyrar, Kúltóbe-Iassy siiaqty obektiler kiredi. «Jahandaǵy zamanaýi qazaqstandyq mádeniet» arnaiy jobasy aiasynda da 20 is-shara ótti», - dedi Aqtoty Raiymqulova.
