Foto: Gov.kz.
Saýran aýdanynda 2024 jyldyń 9 aiynda 42,2 mlrd teńge kóleminde investitsiia tartylyp, 21 joba iske qosylǵan. Onyń 12-i óńdeý ónerkásibi baǵytynda bolsa, 9 joba áleýmettik salaǵa baǵyttalǵan. Bul jaiynda Saýran aýdanynyń ákimi Maqsat Tańǵatarov BAQ ókilderimen ótken brifingte málimdedi, dep habarlaidy «Ult aqparat».
«Oblys ákiminiń tapsyrmasyna sáikes, aýdan kóleminde 2030 jylǵa deiin jalpy quny 209,3 mlrd. teńgeni quraityn 254 investitsiialyq jobany iske asyryp, 4 162 jańa jumys ornyn qurý kózdelýde. Aýyl sharýashylyq salasyna investitsiialyq quny 116,1 mlrd teńge quraityn 68 iri jobany iske asyrý josparlanǵan. Al, ónerkásip salasynda 53,1 mlrd teńgeni quraityn, 85 jobany iske asyrý kózdelip otyr. Sonymen qatar, 2024 jyldyń 9 aiynda aýdannyń jalpy óńirlik ónimi 78,7 mlrd. teńgeni qurap, ótken jylmen salystyrǵanda 100,6%-ǵa artqan. Óńirlik ónimniń 75%-y - aýyl sharýashylyǵy, 11,6%-y - ónerkásip, 10,3%-y - qurylys jáne 3,1%-y saýda salasynyń úlesinde» – dedi aýdan basshysy.
Sondai-aq, Maqsat Asylbekuly aýdan kóleminde óndiristik alańdar qurylatynyn jetkizdi. 2024-2026 jyldary aýdanǵa qarasty Shaǵa, Qarashyq, Iassy, Shornaq jáne Úshqaiyq aýyl okrýgterinen, al 2026 jyldan bastap qalǵan 7 aýyldyq okrýgte óndiristik alańdar qurylmaq. Olardyń qatarynda 13 jihaz jasaý tsehy, 19 qurylysqa qajetti materialdar óndiretin tseh, 2 tamaq ónimderine qajetti materialdar, 1 qolóner buiymdaryn óndiretin jáne 1 tigin tsehy bar.
Sonymen qatar, aýdanda azamattardy turǵyn úimen qamtamasyz etý maqsatynda 3 qabatty 24 páterli jalpy sany 16 turǵyn úidiń qurylysy josparlanǵan. Jyl sońyna deiin 48 páterli 2 turǵyn úi paidalanýǵa beriledi. Kommýnaldyq sala boiynsha, jyl basynan beri aýdanda 10 eldi mekenge tabiǵi gaz tartylyp, gazben qamtý úlesi 43,3%-dy quraǵan. Biyl Oranǵai, Qarashyq, Júinek aýyldyq okrýgterine magistraldy gaz qubyryn salýǵa respýblikalyq biýdjetten qarjy bólinip, qurylys jumystary júrgizilýde. 2024 jyly «Aýyl-El besigi» jobasy aiasynda 31 ishki kóshege, iaǵni 39,4 shaqyrym jolǵa ortasha jóndeý jumystary júrgizilýde. Jumystar aiaqtalǵanda eldi meken joldarynyń jaqsy jáne qanaǵatty jaǵdaiy70%-ǵa jetpek.
