Koronavirýstyń taralýynyń negizgi oshaǵy otbasy bolyp otyr. Jańa oqiǵalardyń kóbeiýi otbasylyq indet oshaqtarynyń úlesine tiesili. Bul týraly qoǵamdyq densaýlyq saqtaý basqarmasynyń basshysy Sáýle Qisyqova aitty, dep habarlaidy "Ult aqparat" qala ákiminiń baspasóz qyzmetine silteme jasap.
«Infektsiianyń jańa oshaqtary baiqalady. Bul - otbasylyq oshaqtar. Kún saiyn biz aýrýdy juqtyrǵan otbasynyń eki nemese keide 5-7 múshesinen virýs tabamyz. Otbasylyq merekelerdi ótkizý kezinde indet juqtyrǵandar baiqaldy, buǵan múldem jol berýge bolmaidy. Kei adamdardyń sanitarlyq normalardy saqtamaǵan jaýapsyz áreketi kishkentai balalar, qarttar men júkti áieli bar otbasynyń barlyq músheleriniń juqtyrýyna ákelip soǵady. Tipti Covid-19 diagnozymen túsken júkti áieldiń sábii de koronavirýspen týǵan kezi boldy. Balalardy analarynan bólek ustaýǵa týra keldi. Kei adamdar óz densaýlyǵyn kútpese de, jaqyndaryn oilaýy tiis. Tájiribe sozylmaly aýrýy joq, deni saý adamnyń ózi koronavirýstan jatyp qalýy múmkin ekenin kórsetip otyr. Aǵza infektsiiamen kúrese almaǵan soń jasandy jeldetý apparatyna qosýǵa týra keldi. Eshbir jaǵdaida ózin-ózi emdeýge bolmaidy», – dedi qoǵamdyq densaýlyq saqtaý basqarmasynyń basshysy Sáýle Qisyqova.
Barlyq infektsiia juqtyrǵandardyń 75% - 18 ben 59 jas aralyǵyndaǵylar.
Koronavirýs pandemiiasy bastalǵannan beri Nur-Sultanda 2543 adam infektsiia juqtyrdy: 34 naýqastyń jaǵdaiy aýyr, onyń 12-si óte aýyr jaǵdaida, ókpeni jasandy jeldetý apparatyna qosylǵan, 10 naýqas indetten kóz jumdy. 1679 naýqas (66 %) jazylyp shyqty.
Sáýle Qisyqova sanitarlyq normalardy qatań saqtaý kerektigin atap ótti: asa qajettilik bolmasa adam kóp jinalatyn jerlerge barmaý, qoǵamdyq orynda maska kiip, araqashyqtyq saqtap jáne antiseptik paidalaný kerek.
Koronavirýs juqtyrý qaýpi áli joiylǵan joq.
