|
Belgili jýrnalist Sáýle Ábildahanqyzynyń uly baqilyq bolǵanyna kóp ýaqyt óte qoimady. Aqyn Qalqaman Sarin ananyń qabyrǵasyn qaiystyrǵan qaiǵyny óleń joldary arqyly órnektegen. Sáýle Ábildahanqyzy sol jyr joldaryn qalyń oqyrmanmen instagram paraqshasynda bólisipti.
|
Alty alashqa aty málim Sáýle edim,
Qansyradym, qalmaǵandai saý jerim.
Qaldy-aý, qaldy-aý jetpei daýa-dármenim,
Soldy-aý, soldy-aý kóktei dáýir-dáýrenim.
Ýa, Táńirim,
Beren qylyp berdiń ul,
Qaityp aldyń. Shemen qylyp sher-ǵumyr...
Jatyrymdy jaryp shyqqan jalǵyzdy,
Qushaǵyna alyp ketti jer jumyr.
Alyp ketti jigit bolǵan kezinde,
Arman bolǵan, úmit bolǵan kezinde,
Ultyn súiip ulyq bolǵan kezinde,
Kemeline kúlip tolǵan kezinde.
Kóńil bólip kórkem etip keshimdi,
Kelin kelip jalǵaidy dep kóshimdi
Júrgenimde, alyp aqyl-esimdi,
Ólim kelip úmitimdi óshirdi!..
Alty alashqa aty málim Sáýle edim,
Baitaq edim,
Baqshaly edim, baýly edim,
Asqaq edim,
Asqar edim,
Taýly edim!
Alasurdym alasaryp záý kógim.
** ** **
Ómirdegi jeńilisim, jeńisim,
Bári, bári, bári, bári sen úshin.
Bárin jasap jaqsylyqtyń sen úshin,
Kerek dese, dosty umyttym sen úshin,
Ulym, eshkim baspasyn dep eńseńdi,
Taý qoparyp, tasty úgittim sen úshin.
Keshir, ulym,
Keshir, meni,
Kesh, ULYM,
Táńir,
Taǵdyr eki etpeidi sheshimin.
Merekemniń shyrqyn buzyp ketti ajal,
Berekemniń buzyp kirip esigin.
Tiri bolyp júrgenimmen... jansyzbyn,
Ótip jatyr maǵynasyz, mánsiz kún.
Sen Anańnyń aiyptama kóz jasyn,
Men ajaldyń aldynda, ulym, álsizbin...
** ** **
Jalǵyz óziń mysyn basyp myń ezdiń
Júrýshi ediń, meniń kórkem minezdim.
Ana! - deseń jan-júrekti terbeitin,
Seniń úniń,
Seniń úniń -- shyn ózge ún!
Anań boldym, aq sútime razymyn,
Jibereiin, boiyńdy endi jaz, ulym.
Jazymyshty aldym ba eken, jazǵyryp,
Keshir, Alla, bolsa tilden jazyǵym?!
Endi seniń kúlgeniń de qur eles,
Kúlim qaǵyp júrgeniń de qur eles.
Dál osyndai qasiretti, qaiǵyny,
Eshbir Ana eshbir janǵa tilemes.
Júregimniń lúpilinde qalasyń,
Bolmysymda, bitimimde qalasyń.
"...Jiber" deidi, jibereiin bara ǵoi,
Qalady artta aza tutyp Anashyń.
Aqyl-oiyń, parasatyń ádemi,
Bári ózińe jarasatyn ádemi.
Tamsandyrǵan tańǵajaiyp álemiń,
Qarsy aldyńnan jol ashatyn ádemi.
Kýá boldym samǵaýyńa, myń shúkir!
Kýá boldym armanyńa, myń shúkir!
Seni kútken asyl, asqaq sezimmen,
Túnderime, tańdaryma, myń shúkir!
Az da bolsa ol da -- mura, myń shúkir!
Ainaldyń sen qorǵanyma, myń shúkir!
Meniń ǵana ǵumyryma buiyryp,
Meniń ulym bolǵanyńa, myń shúkir!
