QR Saýda jáne integratsiia ministri Baqyt Sultanov áleýmettik mańyzy bar azyq-túlik baǵasyn retteý sharalary týraly aityp berdi, dep habarlaidy QazAqparat.
Onyń sózinshe, barlyq óńirde piiaz, sábiz, kartop, kúrish, un aitarlyqtai qymbattaǵan. Baǵanyń ósý sebepteri - rettelmegen ónidiris, tiimsiz deldaldar sanynyń kóp bolýy, saqtaý sharttarynyń oryndalmaýy, tutynýshyǵa deiin kepildengen jetkizý arnalarynyń joqtyǵy bolyp otyr.
«Baǵany turaqtandyrý sharalaryna kelsek, biyl 16 tamyzda ishki saýda erejesindegi ózgerister kúshine endi. Oǵan sáikes, otandyq óndirýshilerge barlyq saýda nysandarynda óz taýarlaryn ornalastyrýǵa múmkindik beriledi. Ol úshin ishki saýda sýbektileri sóreleriniń keminde 30% otandyq azyq-túlik taýarlaryna arnaý kerek. Bul rette halyqqa yńǵaily bolý úshin otandyq taýarlar buryshy «Qazaqstanda jasalǵan» arnaiy belgisimen belgilenedi», - dep túsindirdi Baqyt Sultanov.
Baǵalardy turaqtandyrýdyń taǵy bir sharasy – áleýmettik mańyzy bar azyq-túlik taýarlaryna saýda ústemesin 15%-dan asyrmaý.
«Odan bólek, saýda jelileri áleýmettik mańyzy bar azyq-túlik taýarlaryn jetkizýshilerden syiaqy (retro-bonýs) ala almaidy, al qalǵan azyq-túlik taýarlary boiynsha 5%-dan aspaityn mólsherde belgileidi. Osyǵan bailanysty, biznes sýbektilerine atalǵan normalardy oryndaý boiynsha túsindirý jumystaryn júrgizý kerek», - dedi Baqyt Sultanov.
Sonymen birge, qazirgi ýaqytta ministrlik Tutynýshylardyń quqyqtaryn qorǵaý týraly zań jobasyn ázirleýde. Zańda joǵaryda atalǵan normalardy oryndaý boiynsha ákimdikter men tutynýshylardyń quqyqtaryn qorǵaý departamentteriniń quzireti, ishki saýda sýbektileriniń jaýapkershiligi kózdeletin bolady.
