Saýda jáne integratsiia ministrligi azyq-túlik ónimderi baǵasy úshin baqylaý fýnktsiiasyn ózine almaq. Bul týraly búgin Úkimet otyrysynda atalǵan vedomstvlnyń vitse-ministri Erjan Qazanbaev málim etti, dep habarlaidy QazAqparat.
«Memleket basshysynyń Qazaqstan halqyna Joldaýynda Saýda ministrligine berilgen tapsyrmalar aiasynda atqarylatyn jumystarǵa toqtalsaq, birinshiden, Ulttyq taýar ótkizý júiesiniń negizgi mindeti óndirýshiden riteilge deiin tolyq tsikldi infraqurylymnyń tutas júiesin qurý bolyp otyr. Taýar óndirýshiler men jeke qosalqy sharýashylyqtardyń Kóterme saýda ortalyqtary júiesine erkin jáne básekeli qol jetkizýin qamtamasyz etý maqsatynda jeke ári memlekettik áriptester arasyndaǵy jasalǵan memlekettik -jekeshelik áriptestik sharty aiasynda tiisti normalar kózdeletin bolady. Bul aýyl sharýashylyǵy ónimderin ótkizý naryǵyn keńeitýge múmkindik beredi jáne óndirýshini tutynýshyǵa jaqyndatatyn jeke ekonomikalyq klasterdi qurady», - dedi Erjan Qazanbaev.
Óz kezeginde, erkin básekelestik pen ónimdi saqtaý jáne bólý infraqurylymy tarifteriniń boljamdy deńgeii bizdiń azamattarymyz úshin azyq-túliktiń túpkilikti baǵasyna oń áserin tigizedi.
«Ekinshi tapsyrma – ol óndirýshiden tutynýshyǵa deiingi tizbek boiynsha tamaq ónimderiniń baǵasyn biryńǵai baqylaý jónindegi negizgi jaýapty memlekettik organdy aiqyndaý jáne múddeli memlekettik organdardyń ózara is-qimyl reglamentin ázirleý. Osy tarmaqty iske asyrý úshin ministrlik Ulttyq ekonomika ministrligi jáne basqa da múddeli organdarmen birlesip, bir ailyq merzimde Saýda jáne integratsiia ministrligine óndirýshiden tutynýshyǵa deiingi tizbek boiynsha azyq-túlik taýarlaryna baǵa belgileýdi úilestirý jáne bólý jónindegi ýákiletti organnyń fýnktsiialaryn berý usynystaryn engizedi», - dedi vitse-ministr.
Sonymen qatar, bir ai merziminde salalyq memlekettik organdar men uiymdar arasyndaǵy ózara is-qimyldyń tiisti reglamenti ázirlenetin bolady.
«Bizdiń maqsatymyz – azyq-túlik taýarlarynyń aǵyndary men baǵalaryn monitoringteý men boljaýdyń durys jáne tiimdi júiesin qurý. Bul memleketke naryq konektýrasy men baǵa ózgerýine ýaqtyly jáne jedel den qoiýǵa múmkindik beredi», - dedi ol.
