QR Saýda jáne integratsiia ministri Baqyt Sultanov halyqty vaktsinalaý qarqynynyń eldiń saýda salasyna yqpaly týraly aitty, dep habarlaidy "Ult aqparat".
«Saladaǵy ósim qarqynyna halyqty jappai vaktsinalaý nátijesinde karantin men shekteý is-sharalarynyń jeńildeýi ońtaily áser etedi. Muny álemdik sarapshylar da rastap otyr», - dedi Sultanov onlain rejimde halyq aldynda esep berýi kezinde.
Osy oraida ol Halyqaralyq valiýta qorynyń esep-qisabyn mysal retinde keltirdi.
«Halyqaralyq valiýta qorynyń dereginshe, 2021 jyly vaktsinalaý qarqyny boiynsha kósh bastaǵan elderde, iaǵni halyqtyń 50 paiyzyna ekpe salynǵan memleketterde ekonomika ósimi 5,7 paiyz deńgeiinde bolady dep kútilýde. Sonymen qatar, halyqtyń tórtten biri vaktsinalanǵan damyǵan elderde biyl ekonomika ósimi 3,3 paiyz shamasynda bolady dep eskerilgen», - dedi ministr.
«HVQ esepteýi boiynsha bizde ekonomikalyq ósim 3,2 paiyz deńgeiinde bolady dep aitylǵan. Eger de halyq vaktsina salýda belsendilik tanytsa, bizde ekonomika ósimi men saýda kólemi artady», - dedi Sultanov.
