QR Úkimetinde ótken brifingte QR syrtqy ister ministriniń birinshi orynbasary Shahrat Nuryshev Saýd Arabiiasynyń qazaqstandyqtarǵa týristik vizany berýdi toqtatýy týraly aqparattyń durys emes ekenin aitty, dep habarlaidy "Ult aqparat".
«Bastapqyda BAQ-ta jariialanǵan aqparat durys emes boldy. Ondaǵy tizimde barlyǵy 7 el boldy. Shyn mánisinde, shekteý 21 elge qatysty bolatyn. Qazaqstan 49 eldiń qataryna kirgen jeti eldiń qatarynda kórsetildi, bul elderdiń azamattary Saýd Arabiiasyna kelgen soń áýejaida viza ala alady», — dedi ministrdiń birinshi orynbasary.
Sh. Nuryshev qalǵan 14 eldiń azamattary aldymen vizany rásimdeýge mindetti ekenin, tek sodan keiin ǵana Saýd Arabiiasyna kelýi kerektigin aitty.
«Aqparat durys bolmady, ol taralyp ketti, bizde koronavirýs taralyp, shekteý sodan jasalǵany tárizdi kórindi», — dep túsindirdi Sh. Nuryshev.
Sonymen qatar Shahrat Nuryshev qazaqstandyqtardy Iran men Ońtústik Koreiadan evakýatsiialaý josparlary týraly aityp berdi. Onyń aitýynsha, búginde Iranda Qazaqstannyń 170 azamaty, Ońtústik Koreiada 34 600 jýyq azamaty bar.
«Irannan evakýatsiialaý máselesi ázirge qaralyp jatqan joq. Degenmen, bizdiń Elshilik barlyq azamattarmen jumys jasap jatyr. Irannan elge oralǵysy keletin jaǵdaida, olar qajetti kómekti kórsetýge ázir», — dedi Sh. Nuryshev.
2020 jyldyń 1 naýryzynan bastap Nur-Sultan – Seýl jáne Almaty – Seýl baǵyttary boiynsha turaqty reisterdiń sany aptasyna 9-dan 3 reiske deiin qysqartyldy.
«Reister sany 9-dan 3-ke deiin qysqartyldy, bul qaitýǵa niet bildirgen azamattardyń reisterdi paidalana alýy úshin jasaldy. Evakýatsiia – sońǵy shara, sondyqtan qaitýǵa niet bildirgen tulǵalar ázirge áli de ushyp jatqan reistermen elge orala alady», — dep túsindirdi syrtqy ister ministriniń birinshi orynbasary.
