Saýd Arabiiasy Koroldiginiń quqyq qorǵaý organdary Medina qalasynda «Nazratýllah ábý-Mariiam» degen atpen tanylǵan jalǵan salafizmniń ýaǵyzshysy Nazratýlla Abdýqadyrovty ustady, dep habarlaidy QazAqparat.
Astana Din problemalaryn zertteý ortalyǵynyń sarapshylary bergen málimetterge qaraǵanda, «Nazratýllah ábý-Mariiam» uzaq ýaqyt boiy Internette jalǵan salafizmdi ýaǵyzdaýmen ainalysqan. Saýd Arabiiasynda júrip QR jáne TMD memleketteri azamattarynyń arasynda zańǵa qaishy, jergilikti jamaǵatqa búldirgish yqpaly bar ýaǵyzdar júrgizgen.
«Bul adam destrýktivti ideologiiany jaqtaǵan Saýd Arabiiasynda júrip, ózimen nanym-senimi bir adamdar arqyly Qazaqstanda soqyr dini kózqarastaryn belsendi túrde taratyp, úgittegen.
Onyń «qasietti jerde» ustalýy zańdy oqiǵa boldy. Bul jaǵdai Saýd Arabiiasy Koroldigi progresshil Islamdy ustana otyryp, basqa musylman elderimen ornatylǵan qarym-qatynastardy baǵalaitynyn dáleldeidi.
Buryn dinaralyq arazdyq týdyratyn ýaǵyzdar taratqan Ábdýhalil Ábdýjabbarovtyń (sheih «Halil») ustalyp, Qazaqstanǵa berilýi de osynyń aiǵaǵy», - deidi ortalyq mamandary.
