Qairat Satybaldyuly jáne Qairat Boranbaevqa qatysty qamaýda ustaý merzimi uzartyldy, dep habarlaidy "Ult aqparat".
"12 mamyrda Nur-Sultan qalasynyń mamandandyrylǵan aýdanaralyq tergeý soty kúdikti Qairat Satybaldyulyna qatysty kúzetpen ustaý túrindegi sanktsiialanǵan bultartpaý sharasynyń merzimin 1 ai merzimge uzartty.
10 mamyrda Nur-Sultan qalasynyń mamandandyrylǵan aýdanaralyq tergeý soty kúdikti Qairat Boranbaevqa qatysty kúzetpen ustaý túrindegi sanktsiialanǵan bultartpaý sharasynyń merzimin 1 ai merzimge uzartty", - delingen elordalyq sot habarlamasynda.
Eske salaiyq, 13 naýryzda Sybailas jemqorlyqqa qarsy qyzmet laýazymdyq ókilettikterin asyra paidalaný jáne "Qazaqtelekom AQ-nyń qarajatyn asa iri kólemde urlaý faktileri boiynsha qylmystyq isti tergep jatqanyn habarlaǵan bolatyn. Qairat Satybaldyuly osy qylmystardy jasady degen kúdikpen ustalyp, ýaqytsha ustaý izoliatoryna qamaldy.
Sondai-aq onyń memleket qaýipsizdigine nuqsan keltiretin basqa da qylmystarǵa qatysy bar-joǵy tekserilip jatyr.
Qairat Satybaldyuly Almaty oblysynyń aýmaǵynda, Dýbaiǵa ushyp ketpek bolǵan jerinen ustalǵan. Keiinirek onyń burynǵy áieli de qamaýǵa alyndy. Ol reiderlik áreketter úshin aiyptalyp otyr.
Qairat Satybaldyuly – Qazaqstannyń Tuńǵysh Prezidenti Nursultan Nazarbaevtyń nemere inisi.
Al, Boranbaev 17 naýryzda 2 ai merzimge qamaýǵa alyndy. Ol kvazimemlekettik sektordaǵy asa iri kólemdegi qarajatty jymqyrdy degen kúdikke ilindi.
Boranbaev – iri kásipker. Ol - Qazaqstandaǵy, Belarýstegi jáne Reseidiń birneshe óńirindegi McDonald's jyldam tamaqtaný jelisiniń jáne taǵy basqa iri kompaniialardyń iesi.
Qairat Boranbaevtyń qyzy Álima 2020 jyldyń tamyz aiynda Elbasy Nursultan Nazarbaevtyń qaitys bolǵan jieni Aisultanǵa turmysqa shyqqan. Olardyń Ameli esimdi qyzy men Sultan esimdi uly bar.
