Kollaj: Ulysmedia.kz
Saiasattanýshy Dosym Sátpaev Qazaqstandaǵy Resei elshisi Aleksei Borodavkinniń daýly málimdemesi jóninde pikirin áleýmettik jelige jazdy, dep habarlaidy Ulysmedia.kz.
«Bir jerde bir nárse kemise, ekinshi jerde ol artady. Reseidiń diplomat retinde jumys istegen arnaiy qyzmettegileriniń batys elderinen shyǵarylýy ainalyp kelgende olardyń Qazaqstanda kóbeiýine, onyń ishinde Borodavkinniń (Qazaqstandaǵy Resei elshisi – avt.) qol astyna kelýine ákep soǵady. Bul aqyry eldiń ulttyq qaýipsizdigine aiqyn qater tóndiredi, sebebi olar jergilikti «besinshi kolonnamen» tyǵyz jumys istep, agentterin tartady, jalǵan aqparattardy kóbeitedi», - dep jazdy saiasattanýshy Feisbýktegi paraqshasynda.
Saiasattanýshy osy tolqynnyń bastalatynyn Ýkrainada soǵys bastalǵan kezde eskertkenin eske salady. Onyń jańa tolqyny Ýkrainany qoldaityn azamattyq belsendilerdi shettetýden bastalǵan, keiin qaidaǵy bir ulttyq radikalizmnyń artqany baiqalady degendei jalǵan aqparattyq ósekterge ulasqan.
«Qazaqstandaǵy Resei elshisi ulyderjavalyq shovinizmmen Qazaqstandaǵy reseilik arnaiy qyzmettegilerdiń áreket etý algoritmin ishinara rastap, ashyp berdi. Oǵan bul tapsyrmany Kreml berip otyr. Olar Qazaqstandy Reseidiń geosaiasi yqpaly orbitasynda ustap qalýǵa bar kúshin salady jáne oǵan qarsy kez kelgen adammen kúres júrgizedi. Qazaqstandaǵy bilik ókilderiniń reseilik elshiniń provokatsiialyq málimdemesine reaktsiiasy da qyzyq. Úrei – ol bir másele. Eger bilikte bul málimdemeden úreili eshteńe kórmei otyrǵandardan bólek, ishtei qoldaityndar bolsa – eń qorqynyshtysy da sol. Ne úshin eken?» - dep suraq qoiady Qazaqstan biligine saiasattanýshy.
Eske sala ketsek, Reseidiń Qazaqstandaǵy elshisi Aleksei Borodavkin reseilik basylymdardyń birine suhbat berip, Qazaqstan qoǵamynyń ashýyn týǵyzatyn sózderdi aitqan edi.
«Ókinishke qarai, men ultshyldyq tendentsiialarǵa qatysty alańdaýshylyq bildiremin, tipti radikaldy úrdister dep basa aita alamyn. Qazaqstanda ultshyldyq tendentsiialar barǵan saiyn aiqyn kórinedi. Internette radikaldy ultshyldar múldem aqylǵa qonbaityn radikaldy talaptar, urandar kótergen beinejazbalar kóbeidi. Olardyń deni - rýsofobiialyq urandar», — dedi Borodavkin.
Osydan keiin Májilis spikeri Erlan Qoshanov Reseidiń Qazaqstandaǵy elshisiniń elimizdegi rýsofobiia týraly málimdemesine qatysty pikir bildirdi. Onyń aitýynsha, Borodavkinniń málimdemesi - tájiribeli elshige laiyq sóz emes.
«Onyń suhbatynyń keibir tusy rasymen onyń laýazymyna sáikes kelmeidi jáne oǵan jaqsy ataq ápermeidi. Borodavkin myrza - óte tájiribeli diplomat, biz ony burynnan bilemiz. Biraq ol propagandister men saiasattanýshylarǵa uqsap málimdeme jasamaýy kerek», - dedi Erlan Qoshanov.
Al qazaqstandyqtar Resei Federatsiiasynyń Qazaqstandaǵy elshisi Aleksei Borodavkindi elden shyǵaryp jiberýdi talap etken petitsiiaǵa qol qoiyp jatyr.
