© Sputnik / Abzal Kaliev
Jylýmen jabdyqtaý júielerin jóndeýge bailanysty jylý tarifi kem degende 25%-ǵa, al elektr energiiasy 15%-ǵa kóterilýi múmkin. Bul týraly Energetika ministri Almasadam Sátqaliev málimdedi, dep habarlaidy Sputnik Qazaqstan.
"Jylýdyń shyǵyny kóp ekenin eskersek, meniń oiymsha, tarif kem degende 25 paiyzǵa ósedi. Al eń kóp degende qanshaǵa qymbattaityny investitsiia kólemine bailanysty. Biraq tarif birden ósip ketpeidi", - dedi ministr Májiliste jylý energetikasy týraly zań jobasyn tanystyrǵannan keiin jýrnalisterdiń suraǵyna jaýap berip.
Sondai-aq elektr energiiasynyń tarifi de kóteriledi. Sátqalievtiń aitýynsha, tarifti eki ese ósirý týraly másele osydan bes jyl buryn kóterilgen. Úkimetpen qyzý tartys bolǵan.
"Biz tarifti birden ósirmeý úshin bes jyl ishinde birtindep kóterip turaiyq degenbiz. Alaida sol kezde kóptegen sebepke bailanysty bul sheshim qabyldanbady. Tiisinshe investitsiia da quiylǵan joq. Osy aralyqta jylý júieleri 58 paiyzdan 66 paiyzǵa deiin tozyp ketti", - deidi ol.
Sátqaliev elektr energiiasy tarifi úsh-tórt jyl ishinde jyl saiyn kem degende 15 paiyzǵa ósýi kerek ekenin atap ótti.
