Pavlodar oblysynyń mádeniet, tilderdi damytý jáne arhiv isi basqarmasy «Mádeniet portaly» aqparat agenttigimen birlesip, respýblikalyq Qadyr Taishyqov atyndaǵy satiralyq shyǵarmalar baiqaýyn jariialady, dep habarlaidy "Ult aqparat".
Elimizdegi tótenshe jaǵdaidy eskere kele atalǵan baiqaý «Mádeniet portalynda» onlain túrde ótkizilmek.
Biyl Pavlodar oblysynyń týmasy, kórnekti jazýshy, qazaq satirasynyń negizin salýshylardyń biri, aýdarmashy, jýrnalist, sazger Qadyr Taishyqovtyń týǵanyna 120 jyl tolyp otyr. Osy oraida, respýblikalyq onlain baiqaý jariialandy. Oǵan satira janrynda jazylǵan shaǵyn áńgimeler, ázil-syqaq óleńder, shaǵyn sketchter, ocherkter qabyldanady.
«Baiqaýdyń maqsaty - ádebi shyǵarmalardy keńinen nasihattap, ony oqyrman qaýymǵa, jas urpaqqa patriottyq, azamattyq jáne kórkemdik-estetikalyq tárbie berýdiń tiimdi quraly retinde usyný, daryndy satirik qalamgerlerdi qoldaý, satira janryn nasihattaý jáne osy janrdaǵy jazýshylar men aqyndardy qalyń oqyrmanǵa tanystyrý. Elimizde tótenshe jaǵdaidyń jariialanýyna bailanysty baiqaýdy onlain ótkizýdi uiǵardyq», – dep atap ótti Pavlodar oblystyq mádeniet, tilderdi damytý jáne arhiv isi basqarmasynyń basshysy Ernur Dáýenov.
Onlain baiqaýǵa qazaq jáne orys tilderinde satira janrynda buryn jariialanbaǵan shaǵyn áńgimeler, ázil-syqaq óleńder, shaǵyn sketchter, ocherkter qabyldanady.
Shyǵarmalar «Mádeniet portalynda» jinaqtalyp, jariialanady. Jazbalar 2020 jyldyń 30 mamyryna deiin qabyldanady. Baiqaý jeńimpazdaryna qomaqty qarjylai júldeler taǵaiyndalǵan.
