Sátbaev qalalyq soty adam ólimine qatysty atyshýly is boiynsha úkim shyǵardy. Sottalýshy 10 jylǵa bas bostandyǵynan aiyryldy, - dep habarlaidy Tengrinews.kz agenttigi.
Búgin Sátbaev qalalyq sotynda 28 jastaǵy Dáýlet Altynbekovtiń ólimine sebepshi bolǵan is boiynsha sot úkimi shyqty. Qazaqstan Respýblikasy Qylmystyq kodeksiniń 106-baby 3-bóligi "Densaýlyqqa qasaqana aýyr ziian keltirý" boiynsha aiyptalǵan sottalýshy 10 jylǵa bas bostandyǵynan aiyryldy.
"Sottalýshy Qazaqstan Respýblikasy Qylmystyq kodeksiniń 106-baby 3-bóligi boiynsha kináli dep tanylyp, 9 jylǵa bas bostandyǵynan aiyryldy. Sondai-aq, bul merzimge Qazaqstan Respýblikasy Qylmystyq kodeksiniń 106-baby 1-bóliginde kózdelgen qylmysty jasaǵany úshin buryn ótelmegen merzimi qosa berildi. Sottalýshy 10 jylǵa bas bostandyǵynan aiyryldy, jazasyn ortasha qaýipsizdiktegi túzeý mekemesinde óteidi", - dep úkimdi jariialady sýdia Dáýren Ibraev.
Sonymen qatar, sýdia Sátbaev qalasynyń prokýratýrasyna sotaldy tergep-tekserý satysynda qarama-qaishy aiǵaqtar bergen is boiynsha kýágerlerdiń birin jaýapqa tartý týraly jeke uiǵarym shyǵardy.
Sońǵy sózinde sottalýshy óz kinásin moiyndap, jábirlenýshi taraptan keshirim surady. Alaida marqum Dáýlet Altynbekovtiń týystary sot úkimimen kelispeidi. Olar sottalýshyny "Adam óltirý" baby boiynsha qylmystyq jaýapkershilikke tartýdy talap etti.
"Sottalýshy buryn 106-bap boiynsha sottalǵan. Jazasyn sońyna deiin ótemei, ekinshi ret qylmys jasady. Ol aǵamdy san arteriiasynan jaralady. Almatyda mánerlep syrǵanaýshy Denis Tenge qatysty osyndai qylmysqa nege qatań jaza berildi? Al aǵamyzdy óltirgeni úshin azyraq? Bul ádiletsizdik", – deidi marqumnyń ápkesi Nyshanqul Topshaq.
Sot úkimi áli zańdy kúshine engen joq.
Eske salaiyq, byltyr qarashada Sátbaevtaǵy dámhanada 28 jastaǵy Dáýletbek Altynbekov jaraqat alǵan bolatyn. Ony tanysy pyshaqtap ketken. Jábirlenýshi kóp qan joǵaltyp qaza boldy. Marqumnyń týystary kúdiktini qasaqana kisi óltirgeni úshin sottaýdy talap etip jatyr.
