Q.I. Sátbaev atyndaǵy Ulttyq ǵylymi-zertteý ýniversitetine jańa rektor taǵaiyndaldy, dep habarlaidy "Ult aqparat".
«QR Premer-Ministriniń orynbasary Eraly Toǵjanovtyń tóraǵalyǵymen ótken Respýblikalyq konkýrstyq komissiianyń sheshimimen elimizdegi eń ejelgi tehnikalyq ýniversitettiń rektory laýazymyna Meiram Muhametrahimuly Begentaev taǵaiyndaldy», - delingen JOO saitynda.
Ýniversitet ujymyna jańa rektordy tanystyrý jiynyna QR Bilim jáne ǵylym vitse-ministri Muhtar Dáýlenov onlain formatta qatysty.
«Rektor mindetin ýaqytsha atqarǵan Amandyq Qýatulyna zor alǵys aitamyn. Ol az ǵana ýaqyt ishinde ýniversitettiń damýyna mol úles qosqany sózsiz. Sondai-aq Meiram Muhametrahimulyna jańa laýazymda sáttilik tileimin», – dedi vitse-ministr.
«Sátbaev Ýniversitetiniń rektory bolý men úshin úlken maqtanysh jáne úlken jaýapkershilik. Maǵan kórsetilgen úlken senim úshin zor alǵys aitamyn jáne alǵa qoiylǵan mindetterdi júzege asyrýda áriptesterimniń dostyq kómegine senemin», – dedi Meiram Begentaev óz kezeginde.
Meiram Begentaev 1974 jyly týǵan. QR Parlamenti Májilisiniń V shaqyrylymdaǵy depýtaty. 2001 jyldan bastap ol joǵary bilim berý júiesinde birqatar basshylyq qyzmetter atqardy. Pavlodar qalalyq máslihatynyń III-IV shaqyrylymdarynyń depýtaty.
Memleket basshysy N.Á. Nazarbaevtyń Alǵys hatymen (2005), «Qazaqstan Respýblikasynyń bilim berý isiniń qurmetti qyzmetkeri» tósbelgisimen, qurmet gramotalarymen jáne mereitoilyq medaldarmen marapattalǵan. Qazaqstan Respýblikasy Úkimetiniń «Daryn» memlekettik jastar syilyǵynyń laýreaty (2008).
Sońǵy eki jylda S. Toraiǵyrov atyndaǵy Pavlodar memlekettik ýniversitetiniń rektory qyzmetin atqardy.
