Táýelsizdik merekesine orai aqyn, saǵynyshtyń simvolyna ainalǵan shaiyr-jyraý, «Alash» ádebi syilyǵynyń iegeri Járken Bódeshulynyń shyǵarmashylyǵyna arnalǵan «Sarykóbelek saǵynysh» atty halyqaralyq jazba aqyndar músháirasy ótedi.
Músháirany Dúniejúzi qazaqtarynyń qaýymdastyǵy, «Otandastar qory» KEAQ jáne «Alash-CUP» qaiyrymdylyq qory birlesip uiymdastyryp otyr.
«Elbasy Nursultan Nazarbaev «Bolashaqqa baǵdar: Rýhani jańǵyrý» atty maqalasynda «Adam balasy - sheksiz zerdeniń ǵana emes, ǵajaiyp sezimniń iesi. Týǵan jer – árkimniń shyr etip jerge túsken, baýyrynda eńbektep, qaz basqan qasietti mekeni. Talai jannyń ómirbaqi turatyn ólkesi. Ony qaida júrse de júreginiń túbinde áldilep ótpeitin jan balasy bolmaidy» dep atap ótkendei, týǵan jerge saǵynysh - et júrekti pendeniń júrek túkpirindegi lúpili. Al onyń aqyndar sanasyn bulqyndyryp, jyr bolyp órilmeýi múmkin emes. Osy turǵydan qaraǵanda shetelden kelgen, týǵan jeri jattyń menshiginde qalǵan qazaq aqyndarynyń jan sezimi aitpasa da túsinikti. Týǵan jerin jarty ǵasyr jyrlaǵan Járken aqynnyń «jaýyr bolǵan» saǵynysh derti jyrqumar talai jastyń júregin shymshylaǵan ǵajaiyp sezimge ulasqany anyq. Bul sharanyń maqsaty - jas urpaqtyń sanasynda Járken Bódeshulynyń shyǵarmashylyǵyn nasihattaý, jastar shyǵarmashylyǵyna qoldaý kórsetý», - deidi joba avtory, «Otandastar qorynyń» menedjeri Talapbek Tynysbekuly.
Músháiraǵa qyryq jasqa deiingi aqyndar eki óleńimen qatysa alady.
Birinshi óleńi aqyn Járken Bódeshulynyń shyǵarmashylyǵyna, aqyndyq bolymysyna, tulǵalyq kelbetine arnalýy mindetti.
Ekinshi óleń saǵynysh, týǵan jer taqyrybynda bolmaq.
Shyǵarmalar birinshi jeltoqsanǵa deiin t.talapbek@mail.ru elektrondy poshtasyna qabyldanady. Músháira qortyndysy qazylar alqysynyń sheshimimen Táýelsizdik kúni qarsańynda jariialanyp, jeńimpazdardy saltanatty marapattaý rásimi ótkizilmek.
