Astanada «Saryarqa» gazynyń úi-úilerge jetkizilýin retteitin jańa kompaniia qurylady. Bul týraly Nur-Sultan qalalyq Otyn-energetikalyq kesheni jáne kommýnaldyq sharýashylyq basqarmasy basshysynyń mindetin atqarýshy Ernat Bázil aitty, dep habarlaidy "Ult aqparat".
«Biz áli kúnge deiin elordaǵa keletin gazdyń baǵasyn bilmeimiz. Sebebi «QazTransGaz» túpkilikti baǵany ataǵan joq. Úkimetten qandai kómek bolatynyn surap jatyrmyz. Elorda ákimdigi gazdyń sońǵy tutynýshyǵa jetkenge deiingi baǵasyn tómendetý maqsatynda «Elorda-gaz» kásipornyn qurý týraly sheshim qabyldady. Qazir tiisti qujattardyń bárin jiberdik. Ulttyq ekonomika ministrliginiń Tabiǵi monopoliialardy retteý komitetiniń maquldaýynda jatyr. Olar ruqsat berse, kóp máselelerdi rettei alar edik», - dep jaýap berdi Ernat Bázil búgin elorda ákimdiginde ótken Qoǵamdyq keńestiń otyrysynan keiin tilshilerdiń saýalyna.
Onyń aitýynsha, kásiporyn áleýmettik az qamtylǵan otbasylardyń úiin gazdandyrý, qazandyq satyp alý jaǵynan kómektesedi.
«Gazdy rettep otyratyn esepteýishterdiń baǵasy – 80-90 myń teńge. Otbasylardyń jaǵdaiyna qarai, keibiriniń qorshaýyna deiin gaz jetkizsek, keibiriniń tipti úiine kirgizip berýge tyrysamyz. Osy máselelerdiń bárin rettep otyrý úshin arnaiy uiym kerek», - dedi ol.
Ernat Bázildiń aitýynsha, «Astana sý arnasy» kásiporny sýǵa jaýapty bolatyny sekildi, «Elorda-gaz» - gaz máselesin rettemek.
«Jańa jylǵa deiin qujat jumystary rettelse, jańa jyldan keiin jumysty bastap ketemiz», - dedi ol.
Eske sala ketsek, buǵan deiin Ernat Bázil elordada aldaǵy ýaqytta gaz baǵasy qansha bolatyny belgisiz ekenin málim etken edi.
