Búgin QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda Prezidenttiń Bes áleýmettik bastamasyn iske asyrý aiasynda «Saryarqa» magistraldi gaz qubyryn salý jobasynyń aǵymdaǵy jaǵdaiy týraly energetika ministri Q. Bozymbaev baiandady, dep habarlaidy "Ult aqparat" primeminister.kz portalyna silteme jasap.
Eske sala keteiik, «Saryarqa» magistraldi gaz qubyryn salý jobasy elimizdiń energetikalyq qaýipsizdigin qamtamasyz etýge, ortalyq jáne soltústik óńirlerdi senimdi jáne úzdiksiz gazben jabdyqtaýǵa, sondai-aq, jalpy ekologiialyq jaǵdaidy jaqsartýǵa baǵyttalǵan.
Áleýmettik-ekonomikalyq áseri:
• magistraldi gaz qubyrynyń birinshi kezeginiń boiyndaǵy 171 eldi mekendi kezeń-kezeńimen qamtamasyz etý;
• magistraldi gaz qubyry trassasynyń boiyndaǵy infraqurylymdy damytý;
• qurylys kezeńinde 1690-nan astam jumys ornyn jáne paidalaný kezeńinde shamamen 200 jumys ornyn qurý;
• Astana qalasynyń jáne magistraldi gaz qubyrynyń boiyndaǵy basqa da eldi mekenderdiń ekologiialyq jaǵdaiyn jaqsartý.
QR Energetika ministrliginiń derekterine sáikes, 2018 jylǵy 19 qarashada «AstanaGaz QMG» AQ men «QazQurylysServis» MGQK» AQ arasynda «Saryarqa» magistraldi gaz qubyryn salý týraly kelisimshartqa qol qoiyldy. Jumystar kestesine sáikes bir mezgilde bes jelilik aǵyndy júzege asyrý arqyly magistraldi gaz qubyryn salý josparlanyp otyr. Montajdaý jáne qubyrǵa gidrosynaýdy júrgizý arqyly magistraldi gaz qubyrynyń jelilik bólikterin salýdy aiaqtaý 2019 jyldyń sońyna qarai belgilendi.
Merdigerdiń tehnikasyn, jabdyqtary men jumysshylaryn jumyldyrý biylǵy qańtardyń sońynda bastalady. Trassany daiyndaý 27 aqpanda bastalmaq. Bul rette, jelilik qubyrdyń birinshi partiiasyn jetkizýdi osy jylǵy naýryzda bastap, tamyzda aiaqtaý josparlanyp otyr. Jelilik qubyrlardyń dánekerleý jumystary biyl 21 naýryzda bastalady.
Q. Bozymbaevtyń aitýynsha, gaz taratý jelileri boiynsha qazirgi tańda Astana q,. Aqmola jáne Qaraǵandy oblystarynyń ákimdikteri gaz taratý jelileriniń birinshi kezegin salýdyń jobalyq-smetalyq qujattamasyn (JSQ) aiaqtaýda.
Ákimdikterdiń aqparatyna sáikes, 2019 jyldyń I toqsanynda JSQ boiynsha memlekettik saraptama qorytyndysyn alý kútilýde.
Joǵaryda kórsetilgen jobalar boiynsha JSQ-ǵa «Memsaraptama» RMK-niń keshendi vedomstvodan tys saraptamasynyń oń qorytyndysy alynǵannan keiin Energetika, Qarjy ministrlikteri múddeli memlekettik organdarmen jáne uiymdarmen birlesip, zańnamada belgilengen tártipte «Saryarqa» magistraldi gaz qubyry trassasynyń boiyndaǵy eldi mekenderge gaz taratý jelilerin salýdy qarjylandyrý máselesin pysyqtaityn bolady.
Q. Bozymbaevtyń aitýynsha, atalǵan tapsyrma turaqty baqylaýǵa alynǵan.
