QR Energetika vitse-ministri Maǵzum Myrzaǵaliev «Saryarqa» gaz qubyrynyń qurylysy týraly aityp berdi, dep xabarlaidy QazAqparat tilshisi.
«Saryarqa» gaz qubyry aldymen Qyzylorda, Jezqazǵan, Qaraǵandy, Temirtaý men Nur-Sultan baǵyty boiynsha salynady. Bul - qurylystyń alǵashqy kezeńi. Osynyń arqasynda qubyrǵa jaqyn ornalasqan 740 myń adamdy tabiǵi gazben qamtasyz etýge múmkindik bar. Árine, infraqurylymnyń salynýyna qarai gaz tutynatyn adamdardyń sany artady. Ótken jyly tamyz aiynda Úkimet jobanyń syzba-nusqasy men qarjylandyrý sharttaryn maquldady. Jobanyń quny - 267,3 mlrd teńge. Qarasha aiynda «AstanaGaz QMG» AQ men merdiger kompaniia - «Qazqurylysqyzmet» AQ arasynda tiisti kelisimshartqa qol qoiyldy. Qazirgi kezde barlyq qajetti texnika men mamandar tartyldy. Dánekerleý jumystary bastaldy. «Saryarqa» gaz qubyrynyń, shamamen, 1300 metri salyndy», - dedi M.Myrzaǵaliev QR Májilisinde ótken «dóńgelek ústelde».
Vitse-ministrdiń aitýynsha, búginde Qaraǵandy men Aqmola oblysynda, sondai-aq, Nur-Sultan qalasynda gaz qubyryna qosylyp, shikizatty xalyqqa taratý boiynsha daiyndyq jumystary bastaldy. Jalpy, aldaǵy úsh jylda aimaqtarda gaz infraqurylymyn damytýǵa qosymsha qarjy qarastyrylǵan. Budan bólek, 2030 jylǵa deiin respýblikalyq biýdjetten taǵy shamamen 157 mlrd teńge bólinedi.
«Osy aqsha Nur-Sultan qalasyn, Qaraǵandy, Batys Qazaqstan, Aqtóbe, Mańǵystaý men Aqmola oblystaryn gazdandyrýǵa jumsalady», - dep atap kórsetti M.Myrzaǵaliev.
