«QazMunaiGaz» ulttyq kompaniiasynyń jaýapkershiligi aiasyndaǵy «Saryarqa» gaz qubyrynyń 796,6 shaqyrymy tartyldy. Bul aitýly jobanyń jelilik bóligi qurylysynyń 75%-n quraidy, dep habarlaidy "Ult aqparat" QMG baspasóz qyzmetine silteme jasap.
«Saryarqa» eldiń energetikalyq qaýipsizdigi deńgeiin arttyrýǵa, ortalyq jáne soltústik aimaqtardy kógildir otynmen úzdiksiz qamti otyryp, ekologiialyq ahýaldy jaqsartýǵa tiis. Bolashaqta jekemenshik jáne shaǵyn kommýnaldyq qazandyqtardy, jer úiler men turǵyn úilerdi, jylý-elektr ortalyqtaryn birtindep gazǵa aýystyrý josparlanýda.
«QazMunaiGaz» jaýapkershiligi sheńberindegi qubyrdyń jelilik bóligin salý jumystaryn ústimizdegi jyldyń sońyna deiin aiaqtaý josparlanyp otyr. Sodan keiin jergilikti ákimdikter eldi mekenderdi, sonyń ishinde elordany gazben qamtamasyz etý jumystaryna kirispek.
Búginde Qyzylorda oblysynda dánekerleý-pisirý jumystary tolyqtai aiaqtalyp, Qaraǵandy jáne Aqmola oblystarynda qarqyndy júrip jatyr. Jobany iske asyrý barysynda dánekerleý-pisirýdiń eń ozyq tehnologiialary qoldanylýda. Ozyq tehnologiialar diametri 820 mm qubyrdy táýligine 6 shaqyrymnan asa jyldamdyqpen tartýǵa múmkindik beredi.
Qazirgi kezde dánekerleý-pisirý keshenderi:
- Qaraǵandy oblysynda gaz qubyry jolynyń 794-shi shaqyrymynda («Qaraǵandy» avtomatty gaz taratý stantsiiasyna burý júiesin ornatý jerine deiin 14 shaqyrym) jáne 844 shaqyrymynda («Qaraǵandy» burý júiesin ornatý jerinen keiin 36 shaqyrym);
- Aqmola oblysynda gaz qubyry jolynyń 970-shi shaqyrymynda (Qaraǵandy jáne Aqmola oblystarynyń shekarasynan soltústikke qarai 27 shaqyrym) jáne 1056-shy shaqyrymynda («Astana-1» avtomatty gaz taratý stantsiiasyna burý júiesin ornatý jerine deiin 5 shaqyrym) jumys isteýde.
Magistraldy gaz qubyrynyń qurylys jumystaryna 2 myńnan astam adam jáne 800 tehnika jumyldyrylǵan. Jyljymaly vahtalyq kentter jumysty táýlik boiy júrgizý úshin qajetti jabdyqtarmen jabdyqtaldy. Qyzmetkerler tirshiligi úshin barynsha qolaily jaǵdai jasalǵan. Operatsiialyq qyzmetti aktsionerleri «Samuryq-Qazyna» UÁQ» AQ men «Báiterek» UBH» AQ bolyp tabylatyn «AstanaGaz QMG» AQ júzege asyrady. Qurylystyń bas merdigeri bolyp «QazQurylysServis» MGQK» AQ aiqyndalǵan.
