«Saryarqa» magistraldy gaz qubyrynyń jelilik bólikteri 100 paiyz tóselip, dánekerlendi. Bul týraly búgin Úkimet úiindegi baspasóz máslihatynda QR Energetika vitse-ministri Murat Júrebekov aitty, dep habarlaidy QazAqparat.
«Memleket basshysynyń sailaýaldy baǵdarlamasynda ministrlik aldyna qoiylǵan mindetterdiń biri – elordamyzdy, respýblikanyń soltústik jáne ortalyq óńirlerin gazben jabdyqtaý úshin «Saryarqa» magistraldy gaz qubyrynyń birinshi kezeńin ýaqytyly aiaqtaý. Gaz qubyrynyń bul ýchaskesi Nur-Sultan, Qaraǵandy, Temirtaý, Jezqazǵan qalalarynyń jáne gaz qubyry trassasy boiyna jaqyn eldi mekenderdiń turǵyndaryn tabiǵi gazben qamtamasyz etýge múmkindik beredi», - dedi ol.
Vitse-ministrdiń atap ótýinshe, jobany iske asyrý úshin «AstanaGaz QMG» kompaniiasy quryldy. Onyń aktsionerleri – «Samruq-Qazyna» qory jáne «Báiterek» holdingi.
«Ótken jyldyń tamyzynda Ekonomikany jańǵyrtý jónindegi memlekettik komissiia syzba men qarjylandyrý sharttaryn maquldady. Joba qurylysynyń jalpy quny 267,3 mlrd teńgeni quraidy. Onyń ishinde 80,3 mlrd teńge «AstanaGaz KMG» jobalyq kompaniiasynyń jarǵylyq kapitalyn qurý joly arqyly, 85 mlrd teńge «BJZQ» AQ-nyń obligatsiialyq zaiymy, 102 mlrd teńge Eýraziialyq damý banki men Qazaqstannyń damý bankiniń obligatsiialyq zaimy arqyly bólinedi. Bas merdiger retinde «QazQurylysServis» komppaniiasy aiqyndalǵan», - dedi ol.
Onyń atap ótýinshe, qazirgi ýaqytta «Saryarqa» magistraldy gaz qubyrynyń Nur-Sultan qalasyna deiingi qurylysy aiaqtalýǵa jaqyn.
«Qurylys jumystaryna 1 700 maman men 1 myń arnaiy tehnika jumyldyrylǵan. 1 061 shaqyrym qubyr nemese gaz qubyrynyń 100 paiyz jelilik bóligi tóselip, dánekerlendi. 963 shaqyrym nemese gaz qubyrynyń 91 paiyzy synaqtan ótkizildi», - dedi Murat Júrebekov.
Vitse-ministrdiń sózine qaraǵanda, gaz qubyrynyń, tarmaqtarynyń, 5 avtomattandyrylǵan gaz taratý stansasynyń, gaz ólsheý stansasynyń jáne basqarý beketiniń qurylysy júrgizilip jatyr.
«Tolyqtai alǵanda barlyq jumys kestege sai júrgizilýde jáne osy jyldyń jeltoqsan aiynda magistraldy gaz qubyryn, 5 avtomattandyrylǵan gaz taratý stansasynyń, gaz ólsheý stansasynyń jáne basqarý beketin qamtityn barlyq nysandaǵy qurylys jumystary aiaqtalady. Gaz qubyryn paidalanýǵa qabyldaý osy jyldyń 31 jeltoqsanyna josparlanǵan. Nur-Sultan qalasyna deiingi magistraldy gaz qubyrynyń qurylysy gaz qubyry trassasynyń boiyndaǵy 171 eldi mekendi kezeń-kezeńmen kógildir otynmen qamtýǵa, elordanyń jáne ózge de eldi mekenderdiń ekologiialyq jaǵdaiyn jaqsartýǵa múmkindik beredi», - dedi vitse-ministr.
