Keleshekte 2,7 million adamdy tabiǵi gazben qamtamasyz etetin «Saryarqa» gaz qubyry Qyzylorda oblysyndaǵy «Qaraózek» kompressorlyq stansasynan bastalady. Atalmysh stansadan bastap Qyzylorda, Jezqazǵan, Qaraǵandy, Temirtaý, Astana baǵyty boiynsha gaz qubyry qurylysy júrgiziledi, dep habarlaidy "Ult aqparat" óńirlik kommýnikatsiialar qyzmetine silteme jasap.
«Qaraózek» jańa stansasy «Beineý-Bozoi-Shymkent» magistraldyq gaz qubyrynan 944 shaqyrymda ornalasqan. Osy jylǵy sáýirde Aqtóbe oblysynda paidalanýǵa berilgen «Bozoi» stansasymen qosarly jumysqa eseptelgen. Bul «Beineý-Bozoi-Shymkent» magistraldyq gaz qubyrynyń ótkizgishtik qabilettiligin 10 mlrd tekshemetr gazǵa deiin ulǵaitýǵa múmkindik beredi.
Budan basqa, «Qaraózek» KS qurylysy Qazaqstannyń astanasy Astanany jáne soltústik óńirlerdi aldaǵy gazdandyrýdy esepke ala otyryp josparlanǵan. Bul maqsatty oryndaýǵa stansa qýaty tolyǵymen jetedi.
Biyl «Prezidenttiń bes áleýmettik bastamasy» atty halyqqa úndeýiniń besinshi bastamasy «Eldi gazben qamtamasyz etýdi jalǵastyrý» bolatyn. Osy oraida, qazirgi tańda, «Saryarqa» magistraldy gaz qubyry qurylysynyń alǵashqy kezegindegi Qyzylorda-Jezqazǵan-Qaraǵandy-Temirtaý-Astana baǵytyn 2018 jyldyń qarasha-jeltoqsan ailarynda bastap, 2019 jyldyń jeltoqsan aiynda tolyqtai aiaqtaý josparlanýda.
«Tolyǵyraq aita ketsek, «Saryarqa» MGQ jobasy memlekettik saraptamadan ótkizilip, tamyz aiynyń aiaǵynda qorytyndysy alyndy. Alǵashqy kezeńniń qurylysy 267 mlrd teńgeni qurap otyr. Jalpy uzyndyǵy 1000 shaqyrymǵa sozylǵan gaz qubyry Qyzylorda, Qaraǵandy jáne Aqmola oblystarynyń aýmaǵynan ótkiziledi. Onyń 178 shaqyrymy Syr óńirinde. Jobany iske asyrý barysynda 800-ge jýyq adam ýaqytsha, qurylys aiaqtalǵan soń 220 azamat turaqty jumyspen qamtylady dep josparlanýda.
Aimaqta gaz qysymy deńgeiin retteý maqsatynda taǵy eki birdei kompressorlyq stansa salynýda. Qazaly aýdany Aqsýat eldi mekeni men Aralǵa qarasty Sekseýil aýylynda turǵyzylyp jatqan bul nysandardyń qurylysy biyl aiaqtalýy tiis», - dedi oblystyq energetika jáne turǵyn úi sharýashylyǵy basqarmasy basshysynyń orynbasary Erlan Jolamanov.
Jobany júzege asyrý arqyly «Saryarqa» magistraldy gaz qubyrynyń boiyndaǵy 171 eldi meken tabiǵi gazben qamtamasyz etiledi. Sonymen qatar, shaǵyn jáne orta biznestiń jańa óndiristerin ashýǵa múmkindik beredi dep josparlanýda. Eń bastysy, jobanyń qurylys-montaj jumystarynyń barysynda shamamen ýaqytsha 800 adam jumyspen qamtylsa, magistraldyq gaz qubyry iske qosylǵannan keiin 200-den astam adamdy turaqty jumyspen qamtylady.
