Foto: stan.kz
Túrkistan oblysynda bir mektepte 29 oqýshy men 10 muǵalim ýlandy, dep habarlaidy «Ult aqparat» Otyrar.kz portalyna silteme jasap.
Oblystyq bilim berý basqarmasy taratqan málimetke sáikes, keshe 9-shy mektepte oqýshylar men muǵalimder ózin jaisyz sezingen. Mekteptiń medbikesi shuǵyl jedel járdem shaqyrǵan. Dárigerler 29 bala men 10 pedagogty aýrýhanaǵa alyp ketti.
"Olardyń jaǵdaiy jaqsarǵannan keiin úiine jiberildi. Qazirgi kezde 2 muǵalim aýrýhanada dárigerlerdiń baqylaýynda qalyp otyr", - delingen resmi habarlamada.
Barlyq oqýshy úsh kúnge qashyqtan oqytý formatyna aýystyryldy. Aýdandyq prokýratýra tekseristi bastap ketti. Mektep direktory men onyń orynbasarlaryna qatysty tiisti sharalar qabyldanady.
Buǵan deiin áleýmettik jelide dál sol mektepte túsirilgen video tarady. Oqýshylar ekinshi jáne úshinshi qabatta tereze jýyp júr. Al muǵalimder ishin boiap jatqan. Olardyń arasynda júkti áielder de boldy.
