Dárethanaǵa túsip ketken balardy qutqarǵan politsiia maiory Nurdaýlet Edilov «Erligi úshin» medalimen marapattaldy, - dep habarlaidy QazAqparat.
Oqiǵa jyl basynda Saryaǵash qalasynda bolǵan edi.
Aýdandyq politsiia bólimine habarlasqan jergilikti turǵyn, 3 jasar uly men 10 jasar qyzynyń aýladaǵy dárethana ishine abaisyzda túsip ketkenin aityp kómek suraǵan.
Habarlamany birinshi bolyp alǵan Saryaǵash APB ýchaskelik politsiia inspektorlary, politsiia maiory Nurdaýlet Edilov pen politsiia kapitany Asyl Erejepov, politsiia aǵa leitenanty Aisultan Sapar oqiǵa ornynan tabyldy.
«5 metrlik ájethana ishindegi nájis 10 jasar qyzdyń iyǵyna deiin jetken eken. Al, jasóspirim qyz janyndaǵy 3 jasar inisin nájiske batyp ketpesi úshin kóterip ustap turdy. Betonnan jasalǵan ájethana edenin temir quralmen soqqylap buzdyq. Balalarǵa qaýip tónbesi úshin, ózindik ádispen áreket ettik»,-deidi Nurdaýlet Edilov.
Adam siiatyndai oryn ashylǵan soń, politsiia maiory ájethana ishine túsip, balalardy aman esen alyp shyqqan bolatyn. Oqiǵaǵa kýá bolǵan kórshiler de ýchaskelik inspektorlarǵa alǵystaryn aityp, rizashylyqtaryn jetkizdi.
Jańa jyl merekesiniń qarsańynda Nurdaýlet Edilov QR Prezidenti Q.Toqaevtyń Jarlyǵymen «Erligi úshin» medalimen marapattaldy.
Búginde ýchaskelik politsiia inspektory áriptesterimen birge 21 000 turǵyny bar Qaplanbek aýyldyq okrýginde qyzmet etýde.
Kúndelikti ózine bekitilgen aýmaqty aralap, qylmysty boldyrmaý men aldyn alý jumystaryn atqaryp keledi.
