Foto: Otyrar.kz
Saryaǵash aýdanynda jergilikti depýtat Rýslan Nasirovty bir top er adam soqqyǵa jyqqan, - dep habarlaidy Otyrar.kz.
Oqiǵa halyq qalaýlysynyń úiiniń aldynda, balalarynyń kózinshe bolǵan.
Depýtat ózin uryp-soqqandardyń kim ekenin tanimyn deidi. Onyń aitýynsha, bul depýtattyq mandatymen tikelei bailanysty. Sebebi Rýslan Nasirov Qurkeles aýyldyq okrýginde jaily mektep pen stadion salý úshin bos jatqan jerdiń memleket balansyna ótýi úshin depýtat retinde at salysqan eken. Budan ózge, feldsherlik-ambýlatoriialyq pýnkt salý úshin jer teliminiń memleket menshigine ótýine arasha túsken. Alaida onyń bul belsendiligi áldekimderge jaqpai qalǵan.
"Men olardy tanimyn. Olardyń biri - buryn bizdiń aýylda bi bolǵan kisiniń inisi. Aýylda 3 gektar 70 sottyq jerdi stadion salý úshin memleket balansyna aldyrǵanbyz. Al olar jerdi ózderi eshbir qujatsyz qorshap alǵan. Sosyn mektep úshin jer kerek boldy. Bos jatqan jer edi. Budan ózge, aýylda feldsherlik-ambýlatoriialyq pýnkt (FAP) qajeti týyndady. Aqsaqaldardyń ótinishimen men belsendilik etip, jer telimin taýyp, halyq bolyp FAP saldyq. Bul jer de álgi adamdar ielik etýge niettenip otyrǵan jer telimi eken. Sodan "Nege meniń ruqsatymsyz memleket menshigine bergizesiń?" dep meniń tarapyma "negativ" bastaldy. Shyny kerek, ol jerlerdi men ózimniń menshigime alǵan joqpyn, halyq úshin jasalynǵan tirlik. Sol mektepte búkil aýyldyń balalary oqidy", - dedi depýtat.
Halyq qalaýlysy 7 qazanǵa qaraǵan túni soqqyǵa jyǵylǵan. Onyń aitýynsha, túngi ýaqytta toidan úiine oralǵan. Úige kirgen soń birneshe er adam úiiniń aldyna kelip, depýtatty syrtqa shaqyrǵan. Ol syrtqy qaqpanyń aldyna shyqqan boida birneshe adam jabyla ketken. Bul sát úi aldyndaǵy beinebaqylaý kamerasyna túsip qalǵan.
"Biriniń qolynan pyshaqty kórip, dereý artqa shegine bergenim sol, artymnan ekinshisi kelip, kastetpen (sýyq qarý - esk.) basymnan uryp-soqty. Shynymdy aitsam, aýyr soqqydan esim kiresili-shyǵasyly bolyp qaldym. Sosyn tórteýi jabyldy. Birneshe ret qolmen uryp-soǵyp, tepkiniń astyna aldy. Olardyń qolynan qarýdy da baiqadym. Bul jerde "ózińe kóp alyp kettiń" dep otyr olar. Men - áldeqaida jaspyn, 1989 jylǵymyn. Al olar menen úlken", - dedi ol.
Jábirlenýshi redaktsiiaǵa joldaǵan beinejazbadan birneshe erkektiń bir adamǵa jabylǵanyn kórýge bolady. Ol úi aldyndaǵy beinebaqylaý kamerasyna túsip qalǵan. Keiin úiden áiel shyǵyp qalǵan sátte taiaqtyń astynda qalǵan er adam ózine jabylǵandardan qashyp, úige dereý kirip ketedi.
Jábirlenýshiniń aitýynsha, bul jaǵdaidy estigen onyń inisi oqiǵa ornyna shuǵyl jetken. Inisi kelgen boida Rýslan Nasirov syrtqa shyǵyp, olardy tarqatpaq bolǵan. Onyń aitýynsha, qaita soqqynyń astynda qalǵan. Bir top adam aǵasyna jabylǵan soń inisi kólikten qarý alyp, aýaǵa bir ret oq atqan eken.
"Kólik meniń atymda, qarýdyń da qujaty bar. Bul jerde inim maǵan jabylǵandardy tarqatý úshin solai jasaǵan. Alaida olar inim ekeýmizge jabyla ketti. Úi aldynda turǵan kólikke zaqym keldi. Jalpy bul jaittyń bári meniń bala-shaǵamnyń kóz aldynda boldy. Soqqyǵa jyqqandar "Rýslan" dep birneshe ret aiqailap, meni úiden shyǵaryp aldy ǵoi. Sony estigen balalarym barlyǵyn terezeden qarap turǵan eken", - dedi depýtat.
Rýslan Nasirovtyń úiindegiler politsiia shaqyrǵan. Depýtattyń aitýynsha, politseiler kelemin degenshe bir top adam oqiǵa ornynan qashyp úlgergen. Tártip saqshylary mán-jaidy anyqtaý úshin jábirlenýshini politsiia bólimine alyp barǵan. Keiin depýtatty týystary aýrýhanaǵa jetkizgen. Oǵan "miynyń shaiqalýy" degen diagnoz qoiylǵan.
Túrkistan oblystyq densaýlyq saqtaý basqarmasyndaǵylar jábirlenýshiniń aýrýhanaǵa túskenin rastady.
"7 qazanda saǵat 04:24 shamasynda aýdandyq aýrýhanaǵa 1989 jyly dúniege kelgen naýqas bas aýrýy, júrek ainýy, deneleri kógergen tustyń aýyrsynýy men álsizdik shaǵymymen kelgen. Onyń aitýynsha, 2 saǵat buryn kóshede belgisiz adamdar soqqyǵa jyǵyp, esinen tanǵan. Meditsinalyq tekserý men rentgenografiiadan ótkennen keiin ol travmatologiia bólimshesine jatqyzyldy. Alǵashqy tekserý kezinde jalpy jaǵdaiy ortasha aýyr bolǵan. Qazir naýqastyń jaǵdaiy ortasha, klinikalyq protokol boiynsha em qabyldap jatyr", - dedi basqarmadaǵylar.
Jábirlenýshiniń sózinshe, politseiler úi aldyndaǵy beinebaqylaý kamerasynan barlyq jazbany alǵan. Depýtat bizge inisi kelgenge deiingi sáttiń beinejazbasyn jibergen. Onyń aitýynsha, ony úiindegiler (monitordan) uialy telefonǵa túsirip úlgergen eken.
Túrkistan oblystyq Politsiia departamenti ókilderi bul oqiǵa boiynsha qazir sotaldy tergeý júrgizilip jatqanyn habarlady.
Vedomstvo málimetinshe, 7 qazanda saǵat 3:20 shamasynda aýdandyq politsiia bólimine er adamdar arasynda týyndaǵan janjal týraly habarlama kelip túsken. Janjal kezinde olardyń biri ekinshisin uryp, múlikti búldirgen. Oqiǵa ornyna jedel-tergeý toby jetken.
"Qazir QR Qylmystyq kodeksiniń 293-baby "Buzaqylyq" jáne 202-baby 1-bóligi (Bótenniń múlkin qasaqana joiý nemese búldirý) boiynsha sotaldy tergeý júrgizilip jatyr. Jábirlenýshige qatysty saraptama taǵaiyndaldy. Zattai dálel retinde beinejazbalar alyndy. Bolǵan oqiǵanyń barlyq mán-jaiy anyqtalyp jatyr" delingen oblystyq Politsiia departamentiniń málimetinde.
Al jábirlenýshi depýtat bolsa, ózin soqqyǵa jyqqandar keshirim suramaq túgili áli de qysym kórsetip otyrǵanyn aitty.
"Ekspertiza týraly habarym joq, maǵan aitylmady. Olardyń (soqqyǵa jyqqandar - esk.) týystary politsiia, prokýratýrada istegen. Keshirim suramaq túgili, áli kúnge deiin qoqan-loqqy kórsetip otyr. "Jerdi qaitarǵyzasyń" deidi. Memleketke ótip ketken jerdi men qalai qaitarǵyzamyn? Maǵan jabylǵan kezde olardy tarqatý úshin amalsyzdan aýaǵa qarýdan oq atqan inim qazir qamaýda. "Aryzyńdy qaitaryp almasań, inińdi sońyna deiin qamatamyz" dep otyr", - dedi Rýslan Nasirov.
