فوتو: Otyrar.kz
سارىاعاش اۋدانىندا جەرگٸلٸكتٸ دەپۋتات رۋسلان ناسيروۆتى بٸر توپ ەر ادام سوققىعا جىققان, - دەپ حابارلايدى Otyrar.kz.
وقيعا حالىق قالاۋلىسىنىڭ ٷيٸنٸڭ الدىندا, بالالارىنىڭ كٶزٸنشە بولعان.
دەپۋتات ٶزٸن ۇرىپ-سوققانداردىڭ كٸم ەكەنٸن تانيمىن دەيدٸ. ونىڭ ايتۋىنشا, بۇل دەپۋتاتتىق مانداتىمەن تٸكەلەي بايلانىستى. سەبەبٸ رۋسلان ناسيروۆ قۇركەلەس اۋىلدىق وكرۋگٸندە جايلى مەكتەپ پەن ستاديون سالۋ ٷشٸن بوس جاتقان جەردٸڭ مەملەكەت بالانسىنا ٶتۋٸ ٷشٸن دەپۋتات رەتٸندە ات سالىسقان ەكەن. بۇدان ٶزگە, فەلدشەرلٸك-امبۋلاتورييالىق پۋنكت سالۋ ٷشٸن جەر تەلٸمٸنٸڭ مەملەكەت مەنشٸگٸنە ٶتۋٸنە اراشا تٷسكەن. الايدا ونىڭ بۇل بەلسەندٸلٸگٸ ەلدەكٸمدەرگە جاقپاي قالعان.
"مەن ولاردى تانيمىن. ولاردىڭ بٸرٸ - بۇرىن بٸزدٸڭ اۋىلدا بي بولعان كٸسٸنٸڭ ٸنٸسٸ. اۋىلدا 3 گەكتار 70 سوتتىق جەردٸ ستاديون سالۋ ٷشٸن مەملەكەت بالانسىنا الدىرعانبىز. ال ولار جەردٸ ٶزدەرٸ ەشبٸر قۇجاتسىز قورشاپ العان. سوسىن مەكتەپ ٷشٸن جەر كەرەك بولدى. بوس جاتقان جەر ەدٸ. بۇدان ٶزگە, اۋىلدا فەلدشەرلٸك-امبۋلاتورييالىق پۋنكت (فاپ) قاجەتٸ تۋىندادى. اقساقالداردىڭ ٶتٸنٸشٸمەن مەن بەلسەندٸلٸك ەتٸپ, جەر تەلٸمٸن تاۋىپ, حالىق بولىپ فاپ سالدىق. بۇل جەر دە ەلگٸ ادامدار يەلٸك ەتۋگە نيەتتەنٸپ وتىرعان جەر تەلٸمٸ ەكەن. سودان "نەگە مەنٸڭ رۇقساتىمسىز مەملەكەت مەنشٸگٸنە بەرگٸزەسٸڭ?" دەپ مەنٸڭ تاراپىما "نەگاتيۆ" باستالدى. شىنى كەرەك, ول جەرلەردٸ مەن ٶزٸمنٸڭ مەنشٸگٸمە العان جوقپىن, حالىق ٷشٸن جاسالىنعان تٸرلٸك. سول مەكتەپتە بٷكٸل اۋىلدىڭ بالالارى وقيدى", - دەدٸ دەپۋتات.
حالىق قالاۋلىسى 7 قازانعا قاراعان تٷنٸ سوققىعا جىعىلعان. ونىڭ ايتۋىنشا, تٷنگٸ ۋاقىتتا تويدان ٷيٸنە ورالعان. ٷيگە كٸرگەن سوڭ بٸرنەشە ەر ادام ٷيٸنٸڭ الدىنا كەلٸپ, دەپۋتاتتى سىرتقا شاقىرعان. ول سىرتقى قاقپانىڭ الدىنا شىققان بويدا بٸرنەشە ادام جابىلا كەتكەن. بۇل سەت ٷي الدىنداعى بەينەباقىلاۋ كامەراسىنا تٷسٸپ قالعان.
"بٸرٸنٸڭ قولىنان پىشاقتى كٶرٸپ, دەرەۋ ارتقا شەگٸنە بەرگەنٸم سول, ارتىمنان ەكٸنشٸسٸ كەلٸپ, كاستەتپەن (سۋىق قارۋ - ەسك.) باسىمنان ۇرىپ-سوقتى. شىنىمدى ايتسام, اۋىر سوققىدان ەسٸم كٸرەسٸلٸ-شىعاسىلى بولىپ قالدىم. سوسىن تٶرتەۋٸ جابىلدى. بٸرنەشە رەت قولمەن ۇرىپ-سوعىپ, تەپكٸنٸڭ استىنا الدى. ولاردىڭ قولىنان قارۋدى دا بايقادىم. بۇل جەردە "ٶزٸڭە كٶپ الىپ كەتتٸڭ" دەپ وتىر ولار. مەن - ەلدەقايدا جاسپىن, 1989 جىلعىمىن. ال ولار مەنەن ٷلكەن", - دەدٸ ول.
جەبٸرلەنۋشٸ رەداكتسيياعا جولداعان بەينەجازبادان بٸرنەشە ەركەكتٸڭ بٸر ادامعا جابىلعانىن كٶرۋگە بولادى. ول ٷي الدىنداعى بەينەباقىلاۋ كامەراسىنا تٷسٸپ قالعان. كەيٸن ٷيدەن ەيەل شىعىپ قالعان سەتتە تاياقتىڭ استىندا قالعان ەر ادام ٶزٸنە جابىلعانداردان قاشىپ, ٷيگە دەرەۋ كٸرٸپ كەتەدٸ.
جەبٸرلەنۋشٸنٸڭ ايتۋىنشا, بۇل جاعدايدى ەستٸگەن ونىڭ ٸنٸسٸ وقيعا ورنىنا شۇعىل جەتكەن. ٸنٸسٸ كەلگەن بويدا رۋسلان ناسيروۆ سىرتقا شىعىپ, ولاردى تارقاتپاق بولعان. ونىڭ ايتۋىنشا, قايتا سوققىنىڭ استىندا قالعان. بٸر توپ ادام اعاسىنا جابىلعان سوڭ ٸنٸسٸ كٶلٸكتەن قارۋ الىپ, اۋاعا بٸر رەت وق اتقان ەكەن.
"كٶلٸك مەنٸڭ اتىمدا, قارۋدىڭ دا قۇجاتى بار. بۇل جەردە ٸنٸم ماعان جابىلعانداردى تارقاتۋ ٷشٸن سولاي جاساعان. الايدا ولار ٸنٸم ەكەۋمٸزگە جابىلا كەتتٸ. ٷي الدىندا تۇرعان كٶلٸككە زاقىم كەلدٸ. جالپى بۇل جايتتىڭ بەرٸ مەنٸڭ بالا-شاعامنىڭ كٶز الدىندا بولدى. سوققىعا جىققاندار "رۋسلان" دەپ بٸرنەشە رەت ايقايلاپ, مەنٸ ٷيدەن شىعارىپ الدى عوي. سونى ەستٸگەن بالالارىم بارلىعىن تەرەزەدەن قاراپ تۇرعان ەكەن", - دەدٸ دەپۋتات.
رۋسلان ناسيروۆتىڭ ٷيٸندەگٸلەر پوليتسييا شاقىرعان. دەپۋتاتتىڭ ايتۋىنشا, پوليتسەيلەر كەلەمٸن دەگەنشە بٸر توپ ادام وقيعا ورنىنان قاشىپ ٷلگەرگەن. تەرتٸپ ساقشىلارى مەن-جايدى انىقتاۋ ٷشٸن جەبٸرلەنۋشٸنٸ پوليتسييا بٶلٸمٸنە الىپ بارعان. كەيٸن دەپۋتاتتى تۋىستارى اۋرۋحاناعا جەتكٸزگەن. وعان "ميىنىڭ شايقالۋى" دەگەن دياگنوز قويىلعان.
تٷركٸستان وبلىستىق دەنساۋلىق ساقتاۋ باسقارماسىنداعىلار جەبٸرلەنۋشٸنٸڭ اۋرۋحاناعا تٷسكەنٸن راستادى.
"7 قازاندا ساعات 04:24 شاماسىندا اۋداندىق اۋرۋحاناعا 1989 جىلى دٷنيەگە كەلگەن ناۋقاس باس اۋرۋى, جٷرەك اينۋى, دەنەلەرٸ كٶگەرگەن تۇستىڭ اۋىرسىنۋى مەن ەلسٸزدٸك شاعىمىمەن كەلگەن. ونىڭ ايتۋىنشا, 2 ساعات بۇرىن كٶشەدە بەلگٸسٸز ادامدار سوققىعا جىعىپ, ەسٸنەن تانعان. مەديتسينالىق تەكسەرۋ مەن رەنتگەنوگرافييادان ٶتكەننەن كەيٸن ول تراۆماتولوگييا بٶلٸمشەسٸنە جاتقىزىلدى. العاشقى تەكسەرۋ كەزٸندە جالپى جاعدايى ورتاشا اۋىر بولعان. قازٸر ناۋقاستىڭ جاعدايى ورتاشا, كلينيكالىق پروتوكول بويىنشا ەم قابىلداپ جاتىر", - دەدٸ باسقارماداعىلار.
جەبٸرلەنۋشٸنٸڭ سٶزٸنشە, پوليتسەيلەر ٷي الدىنداعى بەينەباقىلاۋ كامەراسىنان بارلىق جازبانى العان. دەپۋتات بٸزگە ٸنٸسٸ كەلگەنگە دەيٸنگٸ سەتتٸڭ بەينەجازباسىن جٸبەرگەن. ونىڭ ايتۋىنشا, ونى ٷيٸندەگٸلەر (مونيتوردان) ۇيالى تەلەفونعا تٷسٸرٸپ ٷلگەرگەن ەكەن.
تٷركٸستان وبلىستىق پوليتسييا دەپارتامەنتٸ ٶكٸلدەرٸ بۇل وقيعا بويىنشا قازٸر سوتالدى تەرگەۋ جٷرگٸزٸلٸپ جاتقانىن حابارلادى.
ۆەدومستۆو مەلٸمەتٸنشە, 7 قازاندا ساعات 3:20 شاماسىندا اۋداندىق پوليتسييا بٶلٸمٸنە ەر ادامدار اراسىندا تۋىنداعان جانجال تۋرالى حابارلاما كەلٸپ تٷسكەن. جانجال كەزٸندە ولاردىڭ بٸرٸ ەكٸنشٸسٸن ۇرىپ, مٷلٸكتٸ بٷلدٸرگەن. وقيعا ورنىنا جەدەل-تەرگەۋ توبى جەتكەن.
"قازٸر قر قىلمىستىق كودەكسٸنٸڭ 293-بابى "بۇزاقىلىق" جەنە 202-بابى 1-بٶلٸگٸ (بٶتەننٸڭ مٷلكٸن قاساقانا جويۋ نەمەسە بٷلدٸرۋ) بويىنشا سوتالدى تەرگەۋ جٷرگٸزٸلٸپ جاتىر. جەبٸرلەنۋشٸگە قاتىستى ساراپتاما تاعايىندالدى. زاتتاي دەلەل رەتٸندە بەينەجازبالار الىندى. بولعان وقيعانىڭ بارلىق مەن-جايى انىقتالىپ جاتىر" دەلٸنگەن وبلىستىق پوليتسييا دەپارتامەنتٸنٸڭ مەلٸمەتٸندە.
ال جەبٸرلەنۋشٸ دەپۋتات بولسا, ٶزٸن سوققىعا جىققاندار كەشٸرٸم سۇراماق تٷگٸلٸ ەلٸ دە قىسىم كٶرسەتٸپ وتىرعانىن ايتتى.
"ەكسپەرتيزا تۋرالى حابارىم جوق, ماعان ايتىلمادى. ولاردىڭ (سوققىعا جىققاندار - ەسك.) تۋىستارى پوليتسييا, پروكۋراتۋرادا ٸستەگەن. كەشٸرٸم سۇراماق تٷگٸلٸ, ەلٸ كٷنگە دەيٸن قوقان-لوققى كٶرسەتٸپ وتىر. "جەردٸ قايتارعىزاسىڭ" دەيدٸ. مەملەكەتكە ٶتٸپ كەتكەن جەردٸ مەن قالاي قايتارعىزامىن? ماعان جابىلعان كەزدە ولاردى تارقاتۋ ٷشٸن امالسىزدان اۋاعا قارۋدان وق اتقان ٸنٸم قازٸر قاماۋدا. "ارىزىڭدى قايتارىپ الماساڭ, ٸنٸڭدٸ سوڭىنا دەيٸن قاماتامىز" دەپ وتىر", - دەدٸ رۋسلان ناسيروۆ.
