Parlament Senaty Konstitýtsiialyq zańnama, sot júiesi jáne quqyq qorǵaý organdary komitetinde «Qazaqstan Respýblikasynda beibit jinalystardy uiymdastyrý jáne ótkizý tártibi týraly» zań jobasy pysyqtalyp jatyr, dep habarlaidy "Ult aqparat".
Senattyń baspasóz qyzmetiniń málimetinshe, Májiliste maquldanǵan zań jobasyn joǵarǵy palatada odan ári qaraýǵa Senat depýtaty Sársenbai Eńsegenov jaýapty bolyp belgilendi. Konstitýtsiialyq zańnama, sot júiesi jáne quqyq qorǵaý organdary komitetiniń tóraǵasy Vladimir Volkovtyń aitýynsha, senatorlar 17 sáýirde zań jobasyn ázirleýshilermen birge jumys tobynyń alǵashqy otyrysyn ótkizdi.
Qujatqa jaýapty S.Eńsegenov «Qazaqstan Respýblikasynda beibit jinalystardy uiymdastyrý jáne ótkizý tártibi týraly» zańynyń jobasyn ázirleý kezinde halyqaralyq tájiribeler muqiiat zerdelenip, eskerilgenin atap ótti. Senator sondai-aq bul zań jobalary Qazaqstan azamattarynyń Konstitýtsiiada bekitilgen beibit jáne qarýsyz jinalyp, piketke shyǵý, jinalys, mitingiler, demonstratsiia men sherý ótkizý kezindegi týyndaityn qoǵamdyq qatynastardy retteýge baǵyttalǵanyn jetkizdi.
«Qujatta beibit jinalystardy uiymdastyrý jáne ótkizýdiń negizgi qaǵidattary belgilengen. Olar birinshiden zańdylyq, beibit jinalystarǵa azamattardyń qatysýynyń eriktiligi, beibit jinalystar ótkizý kezinde kúsh qoldanbaý sipatynda bolýy, beibit jinalystardy ótkizý paidasyna prezýmptsiiasy jáne taraptardyń jaýapkershiligi, memlekettik qaýipsizdikti, qoǵamdyq tártipti, densaýlyq saqtaýdy, basqa adamdardyń quqyqtary men bostandyqtaryn qamtamasyz etýi», - dedi S.Eńsegenov.
Senator zań jobasynda beibit jinalystardy ótkizýge qatysty habarlama, ótinish berý jáne olardy qaraý merzimi naqtylanǵanyn aita kelip, jergilikti ókildi organdar beibit jinalystardy ótkizý úshin arnaiy oryn belgileýi qajet ekenin jáne ol oryndar eldi mekenderdiń shetinde emes, ortalyǵynda bolýy naqty jazylǵanyn habarlady.
S.Eńsegenov «Qazaqstan Respýblikasynda beibit jinalystardy uiymdastyrý jáne ótkizý tártibi týraly» zań jobasyna qosymsha ilespe qujat ta daiyndalǵanyn atap ótti.
«Ilespe zań qoldanystaǵy zańnamaǵa ózgerister men tolyqtyrýlar engizýdi kózdeidi. Iaǵni, 3 kodeks pen 8 zańǵa ózgerister engiziledi. Bul engiziletin ózgerister «Qazaqstan Respýblikasynda beibit jinalystardy uiymdastyrý jáne ótkizý tártibi týraly» zańda kózdelgen sharalardy iske asyrýǵa baǵyttalǵan», - dedi depýtat.
Aita keteiik, búgin Senatta depýtat Vladimir Volkovtyń tóraǵalyq etýimen Konstitýtsiialyq zańnama, sot júiesi jáne quqyq qorǵaý organdary komitetiniń keńeitilgen otyrysy ótti. Onda «Qazaqstan Respýblikasynda beibit jinalystardy uiymdastyrý jáne ótkizý tártibi týraly» jáne «Qazaqstan Respýblikasynyń keibir zańnamalyq aktilerine Qazaqstan Respýblikasynda beibit jinalystardy uiymdastyrý jáne ótkizý tártibi máseleleri boiynsha ózgerister men tolyqtyrý engizý týraly» zań jobalary qaraldy.
