Ózbekstannyń Sardoba sý qoimasyndaǵy apatqa jol bergen 17 azamattyń ústinen qylmystyq is qozǵaldy. Bul týraly Ózbekstan Respýblikasy Sybailas jemqorlyqqa qarsy kúres agenttiginiń direktory Akmal Býrhonov málimdedi, dep habarlaidy ÝzA ulttyq aqparat agenttigi.
«Qazirgi ýaqytta tergeý organy bógetti jobalaý, salý jáne paidalaný jumystarynda olqylyqtarǵa jol bergen 17 tulǵany anyqtady. Onyń ishinde: tapsyrys berýshi «Sirdario sýv qýrilish invest», jobalaýshy «UzGip» JShQ, bas merdiger «Ýztemiriýlkýrilishmontaj», «Rezaksoi sýv kýrilish», «Omad Dýbl» JShQ, «Sariosiio qýrilish» JShQ, «Trans Servis Kompleks» JShQ, «Týpalang Sherobod», Sý sharýashylyǵy ministrligi jáne keshendi paidalaný direktsiiasynyń laýazymdy tulǵalary Ózbekstan Respýblikasy Qylmystyq kodeksiniń 167, 203, 205, 207, 209, 258 baptaryna sáikes aiyptalýda. Búginde 7 kúdikti qamaýǵa alyndy, 6 aiyptalýshy kepildikpen, 4 adam qolhatpen ýaqytsha bosatyldy», - dedi Akmal Býrhonov.
Onyń málimdeýinshe, Sardobadaǵy apatqa qatysty zertteý jumystaryn tiisti vedomstvolardyń bilikti mamandarynan quralǵan arnaiy komissiia júrgizedi. Qazirgi tańda kinálilerdi anyqtaýmen qatar, kelgen shyǵyndy óndirip alý boiynsha sharalar qabyldanyp jatyr.
Eske sala keteiik, 2020 jyldyń 2 mamyrynda Ózbekstandaǵy Sardoba sý qoimasynyń bógeti jarylyp, eldi mekenderdi sý basyp, kommýnikatsiialyq jeliler men egistikke zaqym kelgen edi.
Osy apatqa bailanysty qosymsha ózge de zardaptardyń aldyn alý maqsatynda taiaýda qazaqstandyq mamandar Sardoba sý qoimasyna tehnikalyq aýdit júrgizý úshin Ózbekstanǵa barady.
