Tótenshe jaǵdailar ministri Iýrii Ilin Sardoba apaty el biýdjetine qansha shyǵyn keltirgenin aitty, dep habarlaidy "Ult aqparat".
«Ózbekstandaǵy sý qoimasy bógetiniń buzylýynan eleýli materialdyq zalal keldi. Saldarynan Túrkistan oblysy Maqtaaral aýdanynyń 5 eldi mekeni zardap shekti. Bul – 6210 adam. Olardyń bárine ýaqtyly materialdyq kómek kórsetildi. Jańa mektepter, aýrýhanalar men úiler salyndy, jańa injenerlik infraqurylym tartylyp jáne joldar tóseldi. Tótenshe jaǵdaidy joiýǵa Úkimet rezervinen 16 milliard teńgeden astam qarajat bólindi», - dedi vedomstvo basshysy halyqqa esep berý kezdesýinde.
Ministrdiń aitýynsha, jalpy sońǵy 5 jyl ishinde tótenshe jaǵdailardy joiýǵa 44 mlrd teńgeden astam qarjy jumsalyp, memlekettik materialdyq rezervte turǵan 365 tehnika qoldanysqa shyǵarylǵan.
