Atyraý oblysyna jumys sapary barysynda QR Mádeniet jáne sport ministri Arystanbek Muhamediuly Saraishyq qalashyǵyn saqtaý máselesi boiynsha keńeitilgen otyrys ótkizdi. Bul týraly ministrliktiń baspasóz qyzmeti habarlady.
Basty taqyryp Atyraý qalasynan 55 shaqyrym jerde, Jaiyq ózeniniń oń jaǵasynda ornalasqan kóne Saraishyq qalashyǵyn saqtaý máselesine arnaldy.
Eskertkishtiń qujatyna sáikes, onyń aýdany 100 ga. quraidy, alaida eskertkishtiń aýmaǵy Jaiyq ózeni shaiýynyń áserinen jyldan jylǵa azaiyp keledi. Qazirgi tańda qalashyqtyń basym bóligi Jaiyq ózeniniń áserinen buzylǵan.
Keńeitilgen otyrysty Atyraý oblysynyń ákimi Nurlan Noǵaev ashty. Otyrysqa depýtattar, tanymal qoǵam qairatkerleri, jergilikti atqarýshy bilik ókilderi, jetekshi tarihshylar men arheologtar, atap aitqanda QR Parlamenti Senatynyń depýtaty Sársenbai Ensegenov, ǵalymdar Zeinolla Samashev, Karl Baipaqov, Búrkitbai Aiaǵan, Bereket Káribaev, filosof Ǵarifolla Esim, ziialy qaýym ókilderi Esenǵali Raýshanov, Mereke Qulkenov jáne t.b. qatysty.
Atyraý oblysynyń ákimdigi 2013 jyly QR Úkimetiniń tapsyrmasyna sáikes qurylǵan «Saraishyq» qalashyǵyn saqtap qalý máselesin talqylaý jónindegi vedomstvoaralyq komissiia sheshimi boiynsha Jaiyq ózeniniń jaǵalaýyn bekitý boiynsha jumystardy júzege asyrǵan.
Saraishyq qalashyǵyn saqtap qalý máselesine qatysty keńeitilgen keńeste atalmysh máselege júieli, birizdi qaraý esebimen biregei tarihi eskerkertkishti saqtaýdyń aldaǵy qabyldanatyn sharalary talqylandy.
Otyrys barysynda QR Mádeniet jáne sport ministri Arystanbek Muhamediuly vedomstvanyń respýblika aýmaǵynda tarihi jáne mádeniet eskertkishterin saqtap qalý boiynsha maqsatty jumys júrgizip jatqandyǵyn atap ótti. Qazirgi tańda Qazaqstanda 220 tarih jáne mádeniet, arheologiia, arhitektýra jáne monýmentaldyq óner eskertkishteri bar.
«Bizdiń basty maqsatymyz - kóne Saraishyq qalashyǵynyń tabiǵi buzylýyn toqtatý. Biz bul biregei mádeni eskertkishti saqtap qalyp, bolashaq óskeleń urpaqqa tabystaý úshin bar kúshimizdi salýymyz qajet. Bul jerde ákimdikke jaǵalaýdy bekitý jumystary boiynsha qabyldanǵan sharalar úshin alǵysymdy bildirgim keledi. Bekitý jumystaryn júrgizgennen keiin arheologiialyq zertteýler óz jalǵasyn tabatyn bolady. Arheologiialyq qazbalardan keiin birden restavratsiialyq jumystarǵa kóshetin bolamyz» - dep atap ótti Arystanbek Muhamediuly.
Joǵaryda atalǵandai, Mádeniet jáne sport ministrligi kóne Saraishyq qalashyǵynda ǵylymi-restavratsiialyq jáne konservatsiialaý jumystaryn júrgizýdi josparlap otyr. Sondai-aq, bul jerde týristerdi tartý úshin kóne Taraz qalashyǵy úlgisinde ashyq aspan astynda mýzei ashý qolǵa alynatyn bolady.
