Búgin Almatyda Dostyq úiinde QR Densaýlyq saqtaý ministri Eljan Birtanov Densaýlyq kodeksin talqylaýǵa arnalǵan dóńgelek ústel ótkizdi, dep habarlaidy QazAqparat.
Jiyn barysynda kópshiliktiń talqylaýyna jastardyń jynystyq tárbiesi týraly másele shyǵaryldy. Jańa zań jobasynda bul máseleler qaralǵan.
QR balalar quqyǵyn qorǵaý jónindegi ýákil Arýjan Sain balalarǵa 16 jasynan bastap ata-anasynyń qatysynsyz dáriger keńesin alýǵa ruqsat berý qajettigin alǵa tartty.
Onyń aitýynsha, bul kóp balalardyń ómiri men densaýlyǵyn saqtap qalmaq.
Al QR Májilis depýtaty, Densaýlyq kodeksin qaraý boiynsha jumys tobynyń tóraǵasy Záýresh Amanjolova osy baǵytta kodekske ózgerister esepke alynatyndyǵy týraly aitty.
«Búgin sarapshylardyń aitqan statistikasyn ózderińiz estigen bolarsyzdar. Qazir balalardyń 40 paiyzy 16-16,5 jasta jynystyq qatynasqa túsedi eken. Eger osy jasta bala dárigerge kelse, dárigerler ata-anańdy alyp kel deidi. Al bala ata-anasyna aitýdan qorqady nemese uialady. Sodan ol qaityp kelmeidi. Ol qasyndaǵy qurbylarynan, dostarynan, internetten aqyl surai bastaidy. Sondyqtan konsýltativtik kómek 16 jastan bolýy kerek. Bul osy Kodekste qarastyrylatyn bolady», - dedi Záýresh Amanjolova.
Esterińizge sala keteiik, jańa Kodeks jobasyn QR Májilisiniń Palata Spikeri Nurlan Nyǵmatýlin «Nur Otan» partiiasy fraktsiiasynyń keńeitilgen otyrysynda talqyǵa salǵan bolatyn.
