بٷگٸن الماتىدا دوستىق ٷيٸندە قر دەنساۋلىق ساقتاۋ مينيسترٸ ەلجان بٸرتانوۆ دەنساۋلىق كودەكسٸن تالقىلاۋعا ارنالعان دٶڭگەلەك ٷستەل ٶتكٸزدٸ, دەپ حابارلايدى قازاقپارات.
جيىن بارىسىندا كٶپشٸلٸكتٸڭ تالقىلاۋىنا جاستاردىڭ جىنىستىق تەربيەسٸ تۋرالى مەسەلە شىعارىلدى. جاڭا زاڭ جوباسىندا بۇل مەسەلەلەر قارالعان.
قر بالالار قۇقىعىن قورعاۋ جٶنٸندەگٸ ۋەكٸل ارۋجان ساين بالالارعا 16 جاسىنان باستاپ اتا-اناسىنىڭ قاتىسىنسىز دەرٸگەر كەڭەسٸن الۋعا رۇقسات بەرۋ قاجەتتٸگٸن العا تارتتى.
ونىڭ ايتۋىنشا, بۇل كٶپ بالالاردىڭ ٶمٸرٸ مەن دەنساۋلىعىن ساقتاپ قالماق.
ال قر مەجٸلٸس دەپۋتاتى, دەنساۋلىق كودەكسٸن قاراۋ بويىنشا جۇمىس توبىنىڭ تٶراعاسى زەۋرەش امانجولوۆا وسى باعىتتا كودەكسكە ٶزگەرٸستەر ەسەپكە الىناتىندىعى تۋرالى ايتتى.
«بٷگٸن ساراپشىلاردىڭ ايتقان ستاتيستيكاسىن ٶزدەرٸڭٸز ەستٸگەن بولارسىزدار. قازٸر بالالاردىڭ 40 پايىزى 16-16,5 جاستا جىنىستىق قاتىناسقا تٷسەدٸ ەكەن. ەگەر وسى جاستا بالا دەرٸگەرگە كەلسە, دەرٸگەرلەر اتا-اناڭدى الىپ كەل دەيدٸ. ال بالا اتا-اناسىنا ايتۋدان قورقادى نەمەسە ۇيالادى. سودان ول قايتىپ كەلمەيدٸ. ول قاسىنداعى قۇربىلارىنان, دوستارىنان, ينتەرنەتتەن اقىل سۇراي باستايدى. سوندىقتان كونسۋلتاتيۆتٸك كٶمەك 16 جاستان بولۋى كەرەك. بۇل وسى كودەكستە قاراستىرىلاتىن بولادى», - دەدٸ زەۋرەش امانجولوۆا.
ەستەرٸڭٸزگە سالا كەتەيٸك, جاڭا كودەكس جوباسىن قر مەجٸلٸسٸنٸڭ پالاتا سپيكەرٸ نۇرلان نىعماتۋلين «Nur Otan» پارتيياسى فراكتسيياسىنىڭ كەڭەيتٸلگەن وتىرىسىندا تالقىعا سالعان بولاتىن.
