Gýmanitarlyq kómek kórsetý – bul Qazaqstannyń syrtqy saiasatynyń mańyzdy baǵyttarynyń biri. Mundai pikirdi QR Prezidenti janyndaǵy QSZI halyqaralyq zertteýler bóliminiń basshysy Ásel Nazarbetova bildirdi, dep habarlaidy QazAqparat.
«Qazaqstan halyqaralyq qaýymdastyqtyń jaýapty múshesi retinde jahandyq koronavirýstyq pandemiiaǵa qarsy turý jaǵdaiynda seriktes jáne kórshiles elderge ekonomikalyq qoldaý kórsetý nietimen qajetti gýmanitarlyq kómekti jalǵastyrýda. Memleket basshysy Qyrǵyz Respýblikasymen dástúrli dostyq, odaqtastyq jáne strategiialyq seriktestik qaǵidalaryn basshylyqqa ala otyryp, Qazaqstan halqy atynan baýyrlas qyrǵyz halqyna gýmanitarlyq kómek kórsetý týraly sheshim qabyldady. Aýdarylǵan gýmanitarlyq kómektiń jalpy kólemi 10 myń tonna undy quraidy. Onyń alǵashqy partiiasy Qyrǵyzstanǵa jalpy júktemesi 4500 tonnaǵa jýyq bidai unymen osy jyldyń 18 mamyrynda jetkizildi. Gýmanitarlyq kómekti qabyldaýǵa qatysqan Qyrǵyzstannyń Aýyl, orman jáne sý sharýashylyǵy ministriniń orynbasary Azamat Mýkashev qyrǵyz tarapy Qazaqstan Úkimeti kórsetken kómekti joǵary baǵalaitynyn, kórsetilgen qoldaý úshin zor alǵysyn bildiretinin jáne undy halyqqa, onyń ishinde ásirese áleýmettik jaǵynan nashar qamtylǵan adamdarǵa taratý máselesiniń pysyqtalyp jatqanyn atap ótti», - dedi Ásel Nazarbetova QazAqparat tilshisine bergen suhbatynda.
Onyń aitýynsha, COVID-19 pandemiiasy bastalǵannan beri Qazaqstan qyrǵyz tarapynyń ótinishteri negizinde buǵan deiin de Qyrǵyzstanǵa gýmanitarlyq kómek kórsetti. Atap aitqanda, 2020 jyldyń mamyr aiynda 5 myń tonna qazaqstandyq un kórshi elge tegin berildi. Mundai kómek Tájikstanǵa da kórsetilgen bolatyn. Ár elge jalpy somasy 3 million AQSh dollarynan asatyn kómek berildi. Odan bólek byltyrǵy jyldyń qarasha aiynda Qazaqstan úkimeti Qyrǵyzstanǵa otandyq óndiristiń 400 dana portativti jeldetkishi men 2 mln meditsinalyq maskalaryn jiberdi.
«Taǵy da aita ketsek, 14 mamyrda QR Prezidenti Qasym-Jomart Toqaevtyń tapsyrmasyna sáikes Qazaqstan men Úndistan arasyndaǵy strategiialyq seriktestik qaǵidattaryn basshylyqqa ala otyryp, Úndistanǵa kúrdeli epidemiologiialyq jaǵdaiǵa bailanysty gýmanitarlyq kómek kórsetildi. Jalpy salmaǵy 40 tonnaǵa jýyq júkke meditsinalyq maskalar, respiratorlar, qorǵanysh kostiýmderi jáne portativti jeldetkishter kiredi. Jalpy, gýmanitarlyq kómek kórsetý – bul Qazaqstannyń syrtqy saiasatynyń mańyzdy baǵyttarynyń biri», - dedi sarapshy.
Bólim basshysynyń atap ótýinshe, Qazaqstan birqatar elderge sońǵy 20 jyl ishinde damýǵa resmi kómekke uqsas maqsattar úshin 542 million AQSh dollarynan astam qarjy bóldi.
«Qysqa merzim ishinde Qazaqstan kómek alýshydan Ortalyq Aziianyń basqa elderi men Aýǵanstanǵa kómektesýshi halyqaralyq donorǵa ainaldy. Ceriktes elderdiń áleýmettik-ekonomikalyq damýy jáne onyń azamattarynyń ál-aýqatyn jaqsartýǵa at salysý maqsatynda «Damýǵa resmi kómek týraly» Qazaqstan Respýblikasynyń 2014 jylǵy 10 jeltoqsandaǵy Zańyna sáikes, 2020 jylǵy 15 jeltoqsanda «KazAID» qazaqstandyq halyqaralyq damý agenttigi quryldy», - dedi ol.
