Respýblikalyq notariattyq palatanyń tóraiymy Ásel Janábilova notariat salasyndaǵy reformalardy túsindirdi, dep habarlaidy QazAqparat.
«Qazaqstan Respýblikasynyń Azamattyq kodeksiniń 152-babynda bekitilgen Qazaqstanda elektrondy qujat almasýdy belsendi jetildirý, mámilelerdi jazbasha nysanda qaǵaz jetkizgishte jáne de elektrondyq nysanda jasaý quqyǵy notariýstarǵa notariattyq is-áreketterdi elektrondy nysanda jasaý kezinde elektrondyq tsifrlyq qoltańba quraldaryn nemese grafikalyq planshetterdi paidalaný quqyǵyn zańnama júzinde bekitýge múmkindik berdi. Osy oraida qaǵaz jetkizgishtegi qujattar birte-birte artta qalyp bara jatyr: olardy únemi ózińmen alyp júrýge yńǵaisyz, ylǵi jalǵyz danadaǵy qujatty joǵaltyp alý jáne búldirip alý qaýpi bolady. Zańmen máni qaǵaz júzindegi qujatqa teń tolyǵymen materialsyzdandyrylǵan elektrondyq túrdegi qujatty qurý kózdelgen», - dedi palata basshysy Ortalyq kommýnikatsiialar qyzmetinde notariat týraly zańnamany iske asyrý barysyn túsindirý kezinde.
Onyń aitýynsha, notariattyq qujatqa elektrondyq tizilim arqyly qurylatyn, avtomatty túrde derekter qorynda tirkeletin jáne keiin ózgertýge jatpaityn, biregei identifikatsiialyq kod - QR-kod beriledi. Bul qujatty burmalaýdan saqtaýǵa múmkindik beredi.
Zańmen notariýspen daiyndalǵan elektrondyq túrdegi qujattyń qaǵaz júzinde qujatqa, sonymen qatar qaǵaz júzindegi qujattyq elektrondyq túrdegi qujatqa teńdiligin kýálandyrý boiynsha notariattyq is-áreket engiziledi.
«Tájiribege keletin bolsaq, bul kelesini bildiredi. Notariýsqa qaǵaz jetkizgishtegi qujat usynylady. Notariýs onyń elektrondyq túrdegi beinesin jasaidy jáne olardyń teńdiligin rastaidy, iaǵni bul eki qujat mátinderiniń uqsastyǵyn rastaidy. Nátijesinde, bastapqy jáne týyndy qujattardyń teń zańdyq kúshi belgilenedi», - dedi Ásel Janábilova.
Sonymen qatar, notariýs elektrondy túrde kelip túsken qujatty qaǵazǵa túsirip, onyń birdeiligin kýálandyrady. Bul turǵyda elektrondy qujatty jasatqan tulǵanyń qoly tekserýden ótkeni týraly kórsetedi.
