QR Premer-Ministri Asqar Mamin men Tatarstan Prezidenti Rýstam Minnihanov Qaraǵandy oblysynyń Saran qalasynda shina shyǵaratyn zaýyttyń qurylysyn bastap berdi, dep habarlaidy "Ult aqparat".
Jobany «Alliýr» kompaniialar toby» AQ jáne «Tatneft» JAQ birlesken kásiporny – «KamaTyresKZ» JShS júzege asyrady.
Zaýyttyń óndiristik qýaty birinshi kezeńde jyl saiyn 3,5 mln kópbeiindi shinany quraidy, keiinnen jylyna 9 mln shinaǵa deiin jetkiziledi. Zaýyt QR avtomobil óndirisin oqshaýlaý deńgeiin arttyrýǵa jáne shinalar importyn almastyrýdy qamtamasyz etýge múmkindik beredi. Bul rette ónimniń 40%-yn eksporttaý josparlanýda. Jobany 2022 jyldyń sońynda iske asyrý josparlanǵan. Investitsiialardyń jalpy kólemi 125 mlrd teńgeni quraidy.
Zaýytta 1100-den astam joǵary bilikti jańa jumys oryndary qurylatyn bolady. Kásiporyn personaly «Tatneft» JAQ shina kásiporyndarynda taǵylymdamadan óte bastady.
Úkimet basshysy shina zaýytyn salý jobasy Qazaqstan men Resei arasyndaǵy ónerkásiptik kooperatsiianyń naqty is júzinde keńeigenin aiǵaqtaitynyn atap ótti.
«Saran qalasynda shina zaýytyn salý Qaraǵandy oblysynyń jáne jalpy Qazaqstannyń ekonomikasyna mýltiplikativti áserin tigizedi, onyń básekege qabilettiligin arttyrady jáne joǵary bilikti jańa jumys oryndaryn qurady. Zaýyt óńirdegi eń iri zaýyttardyń birine ainalady, onyń ónimderi joǵary eksporttyq áleýetke ie bolady», — dedi A. Mamin. Tatarstan Prezidenti R. Minnihanov óz sózinde Qazaqstan Tatarstannyń jetekshi sheteldik seriktesteriniń biri bolyp tabylatynyn atap ótti. 2020 jyly pandemiiaǵa qaramastan taýar ainalymy 14%-ǵa ósip, $630 mln-nan asty. «Shina zaýytynyń salynýy men iske qosylýy Qazaqstannyń qarqyndy áleýmettik-ekonomikalyq damýyn qamtamasyz etý jónindegi sharalar kesheniniń mańyzdy elementine ainalatynyna, sondai-aq Resei Federatsiiasy men Qazaqstan Respýblikasynyń qarym-qatynasyn nyǵaitý jolynda Tatarstan-Qazaqstan yntymaqtastyǵyn odan ári arttyrýǵa túrtki bolady dep senemin», — dedi ol.
Indýstriialyq aimaq aýmaǵynda shina zaýytynyń qurylysy úshin beton quiý rásimine Qaraǵandy oblysynyń ákimi Jeńis Qasymbek, Indýstriia jáne infraqurylymdyq damý ministri Beibit Atamqulov, «Tatneft» JAQ bas direktory Nail Maganov, «Alliýr» kompaniialar toby» AQ direktorlar keńesiniń tóraǵasy Andrei Lavrentev jáne «KamaTyresKZ» JShS direktory Aleksandr Smyshliaev qatysty.
QR Premer-Ministri A. Mamin men Tatarstan Prezidenti R. Minnihanovtyń qatysýymen «QazMunaiGaz» UK» AQ men «Tatneft» JAQ arasynda bitýmdy modifikatsiialaýda, adgezivterdi, jelimderdi, rezeńkeler men ekologiialyq taza shinalardy daiyndaýda qoldanylatyn býtadien kaýchýkterin óndirý jobasy boiynsha yntymaqtastyqtyń bazalyq sharttary týraly kelisimge qol qoiyldy.
Jobany iske asyrý merzimi – 2021-2025 jyldary, óndiris qýaty jylyna 186 myń tonna býtadien kaýchýgy men 170 myń tonna izobýtandy quraityn bolady. Budan basqa, QR Indýstriia jáne infraqurylymdyq damý ministrligi men «Tatneft» JAQ arasynda Qazaqstanda bitým zaýytyn salý nieti týraly kelisimge qol qoiyldy.
Qaraǵandy oblysyna jumys sapary aiasynda Qazaqstan Úkimetiniń basshysy men Tatarstan Prezidenti sonymen qatar «Soltústik-Ońtústik» baǵyty boiynsha aýyl sharýashylyǵy ónimderiniń saýda aǵymyn bailanystyryp otyrǵan QR-daǵy eń iri «Global City» kóterme-taratý ortalyǵynyń jumysymen tanysty.
