Buqaralyq sportty damytý – jergilikti atqarýshy organdar men barlyq deńgeidegi sporttyq mekemelerdiń basty mindeti bolyp qala beredi.
Mádeniet jáne sport ministrliginiń Sport jáne dene shynyqtyrý isteri komitetiniń tóraǵasy Serik Sápiev Prezidenttiń buqaralyq sportty damytý tapsyrmasyna bailanysty qandai sharalar qolǵa alynatynyn aityp berdi, dep habarlaidy QazAqparat.
«Prezident Qasym-Jomart Kemeluly Qazaqstan halqyna Joldaýynda jas erekshelikterine qaramastan, buqara arasynda salaýatty ómir saltyn nasihattap, sportty damytý qajet ekendigin de aitty. Bul óte mańyzdy mindet dep aitar edim», - deidi Serik Sápiev.
Jazǵy Olimpiada oiyndarynyń chempiony óz sózinde Mádeniet jáne sport ministrligi osy oraida qarqyndy jumys júrgizip jatqanyn atap ótti.
«Ministrlik alǵa qoiǵan mindetterdi iske asyrýdyń aiasynda 2018 jyldyń qorytyndysy boiynsha halyqtyń 29,8 paiyzy dene shynyqtyrý jáne sportpen ainalysatyny belgili bolyp otyr. Bul respýblikanyń sportpen shamamen 5,5 mln adamnyń ainalysatyyn bildiredi. 2019 jyldyń birinshi jartyjyldyǵynda respýblika boiynsha 2,7 millionnan astam adamdy qamtyǵan 27 myńnan astam sporttyq is-shara ótkizildi. Onyń ishinde 1,1 millionnan astam adamdy qamtityn 16 myńnan astam sporttyq is-shara aýyldy jerlerde uiymdastyryldy», - deidi ol.
Serik Sápiev sondai-aq, Prezidenttiń óz Joldaýynda sport infraqurylymyn damytyp, balalar jáne jasóspirimder sportyna basymdyq berý týraly tapsyrmasy oryndalatynyn aityp ótti.
«Halyq arasynda buqaralyq sportty damytyp, keńinen nasihattaý úshin sportqa degen qyzyǵýshylyqty erte jastan bastap oiatý qajet. Balalar men jastardy sportqa baýlý – ult densaýlyǵynyń kepili. Jergilikti atqarýshy organdardyń usynǵan statistikasyna sáikes, elimizde mektep jasyndaǵy balalardyń qatarynda 1,8 mln bala dene shynyqtyrý jáne sportpen ainalysady. Halyqtyń sportpen jappai shuǵyldanýy úshin sporttyq infraqurylymdy damytý qajet. Elimizde 11,1 myń dene shynyqtyrý jáne sport nysany bar. Alaida bul halyqtyń sporttyq nysandarǵa degen qajettiligin jabýǵa azdyq etedi. Búgin de biz 100 dene shynyqtyrý-saýyqtyrý keshenin salý tapsyrmasyn oryndaýdamyz», - deidi ol.
Serik Sápievtiń aitýynsha, júrgizilgen taldaý jumystarynyń nátijesinde, óńirlerde sport zaldarǵa degen qajettilik 1 mln 457 myń sharshy metrdi quraityny belgili boldy.
«Osy oraida ministrlik 2019 jyly salynatyn jobalar tizimin naqtylady. 22 dene shynyqtyrý-saýyqtyrý kesheni, 2020 jyly - 34, 2021 jyly – 44 nysan salynady. Aimaqtarda dene-shynyqtyrý saýyqtyrý keshenderiniń 100, 160 jáne 320 oryndyq tiptik jobalary qarastyrylǵan. Joǵaryda atalǵan keshenderdiń qurylysy jergilikti biýdjet jáne demeýshiler qarajaty esebinen júzege asyrylady. Buqaralyq sportty damytý – jergilikti atqarýshy organdar men barlyq deńgeidegi sporttyq mekemelerdiń basty mindeti bolyp qala beredi», - dedi Serik Sápiev.
Eske sala ketsek, kúni keshe Qazaqstan halqyna Joldaýyn jariialaǵan Memleket basshysy Qasym-Jomart Toqaev buqaralyq sportty damytýda keshendi baǵdarlama qabyldaý kerektigin málimdegen bolatyn.
«Ult densaýlyǵyn bekemdeý máselesi de óte ózekti. Barlyq jas sanattary arasynda buqaralyq sport túrlerin nasihattai berý kerek. Balalar úshin sporttyq infraqurylymnyń barynsha qoljetimdi bolýyn qamtamasyz etý kerek», - dedi Prezident.
