MSM Sport jáne dene shynyqtyrý isteri komitetiniń tóraǵasy Serik Sápiev boksshylardyń kemshiligi týraly Beijiń Olimpiadasynyń chempiony Baqyt Sársekbaevtyń synyna jaýap berdi, dep habarlaidy QazAqparat.
«Qashyqtan kóbirek jumys isteý, qarsylasqa shabýyldaýǵa bailanysty nusqamalar boldy, árine qarsylasqa shabýyl jasaǵan soń durys qorǵanyp, ózi soqqy jasaý kerek edi. Baqyt Sársekbaev osyny aitqysy keldi, men onymen tolyq kelisemin, al tómpeshtep urý báriniń qolynan keledi. Ol durys aitady, qorǵana da bilý kerek, qarsy shabýyldy da jasaý kerek», - dep jaýap berdi Sápiev Ortalyq kommýnikatsiialar qyzmetinde tilshi suraǵyna.
Serik Sápiev bul turǵyda jattyqtyrýshylardyń da jetilip, óz shákirtterimen jumys isteýi keregin aitty.
Buǵan deiin Serik Sápiev Qazaqstan boksshylary qansha júlde ákelýi múmkin ekenin aitqan edi.
«Bokstan júlde alýǵa áli de úmitimiz bar. Úsh-tórt medal alýǵa bolady. Endi Sáken Bibosynovtyń qarsylasy – Frantsiia boksshysy, ol óte myqty, odan ótse kelesi qarsylastarynyń deńgeii frantsiialyqtai bolmaidy. Sosyn Ábilhan Amanquldyń, Qamshybek Qońqabaevtyń jáne Zákir Safiýllinniń qasrylastary aitarlyqtai kóshbasshylar emes, olardy jeńýge bolady. Sol úshin qalǵan tórt boksshymyz tórt medal ákelýi de múmkin», - dedi boksshy.
