QR Mádeniet jáne sport ministrligi sport jáne dene shynyqtyrý komitetiniń tóraǵasy Serik Sápiev «GGG-Rolls» anderkartynda Daniiar Eleýsinovtiń sharshy alańǵa shyqpaýyna qatysty oiyn aitty, dep habarlaidy QazAqparat tilshisi.
«Bul týraly ne aitýǵa bolady? Men kásipqoi bokstyń qyr-syryn tolyq bilmeimin. Iri aiqastardyń anderkartyna sportshylardy qalai qosatynynan azdap habarym bar. Bul - olardyń qarym-qatynastary. Ózderi sheship alar. Ekeýi de otandasymyz. Daniiardy atalmysh tizimge nelikten qospaǵanyn bilmeimin. Bálkim, belgili bir niýanstar bar shyǵar. Onyń bárin aqyryna deiin bilmeimiz», - dedi Serik Sápiev bodibildingten elordada ótetin Orta Aziia chempionatyna arnalǵan baspasóz máslihatynan keiin QazAqparat tilshisine.
Serik Sápiev óz sózinde kásipqoi boksta ártúrli jaǵdailar bolyp jatatynyn tilge tiek etti.
«Sebebi, kásipqoi boksta árbir boksshy belgili bir qarsylasty shaqyrady delik. Al shyntýaitynda ol osy shaqyrýymen úlken gonorar surap turǵan bolar. Máselen, aǵylshyn boksshysy Djo Sonders keýdesin toqpaqtap, Golovkindi jekpe-jekke shaqyrdy. Gena álbette, onymen qýana-qýana shyǵar edi. Biraq, Sonderstiń promoýterleri Golovkinniń kóńilinen shyqpaityn sharttardy atady. Al shyntýaitynda basymdyq Golovkinde edi. Ol - «A» sanatyndaǵy boksshy. Olar bolsa, meniń oiymsha, ádiletsiz sharttardy usynǵan bolýy kerek. Bul rette Golovkin negizgi shartty ataityn boksshy edi. Olar bolsa, eshbir boksshy kelispeitindei shartty usyndy. Sondyqtan, aiqas ta uiymdastyrylmady. Osyndai niýans bar. Sol sekildi, Golovkin men Eleýsinovte de... Bilmeimin, bálkim, ol jerde de qandai da bir ishki niýanstar bar shyǵar. Kópshilikke aqparat taratylyp ketedi. Al bul jerde ekeýi de aitqysy kelmeitin belgili bir jai bolýy múmkin. Biz bilmeimiz», - dedi Serik Sápiev.
Eske sala ketsek, taiaýda Daniiar Eleýsinovtiń Golovkinniń jekpe-jeginde óner kórsetpeitini belgili bolǵan edi. Boksshynyń menedjeri Ziia Aliev Sports.kz-ke bergen suhbatynda Eleýsinovtiń 8 maýsymdaǵy Golovkin-Rolls anderkartyndaǵy jekpe-jegi belgisiz sebepterge bailanysty bolmaitynyn jetkizgen.
Keiin bul máselege qatysty QR Kásipqoi boks federatsiiasynyń vitse-prezidenti Viktor Demianenko pikir bildirip, Golovkin men Eleýsinov arasynda qandai da bir túsinbeýshilik bar degenge senbeitinin aitqan bolatyn.
