Biylǵy kóktemgi dala jumystaryn qarjylandyrýǵa memleket tarapynan 116,8 mlrd teńge kredit qarjysy qarastyrylǵan. Bul týraly búgin Úkimet otyrysynda QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Biyl egis jumystaryn júrgizý úshin Energetika ministrliginiń kelisimimen aqpan-maýsym ailaryna shamamen 380 myń tonna dizel otyny bólindi. Qazirgi ýaqytta oblystardyń operatorlary munai óńdeý zaýyttarymen sharttar jasasý jáne diqandar úshin dizel otynyn tiep-jóneltý rásimderin júrgizýde. Kesteniń qoldanylý kezeńinde Aýyl sharýashylyǵy ministrligi Energetika ministrligimen birlesip. óńirlerge munai óńdeý zaýyttarynan dizel otynynyń tiep-jóneltilýine kún saiyn monitoring júrgizip otyr», - dedi Saparhan Omarov.
Ministrdiń atap ótýinshe, biylǵy kóktemgi dala jumystaryn qarjylandyrýǵa memleket tarapynan 116,8 mlrd teńge kredittik qarjy qarastyrylyp otyr. Onyń ishinde agroónerkásiptik keshen sýbektilerin qoldaý is-sharalaryn júrgizý úshin «Agrarlyq nesie korporatsiiasy» AQ respýblikalyq biýdjetten kóktemgi dala jáne egin jinaý jumystaryn júrgizýge 70 mlrd teńge kóleminde biýdjettik kredit bóldi.
«Búgingi kúni «Keń dala» baǵdarlamasy aiasynda 48,6 mlrd teńge somasyna 1 326 aýyl sharýashylyǵy taýaryn óndirýshi qarjylandyryldy. Taǵy 562 aýyl sharýashylyǵy taýaryn óndirýshi 10,6 mlrd teńge somasyna qarjylandyrylý satysynda. Sonymen qatar, «Aýyl sharýashylyǵyn qarjylai qoldaý qory» AQ kreditter kólemi 6 mln teńgeden aspaityn kóktemgi dala jumystaryn júrgizýdi qarjylandyratynyn da atap ótý qajet. Búgingi tańda 60-tan astam usaq aýyl sharýashylyǵy taýaryn óndirýshige 370 mln teńgeden astam qarajat berildi», - dedi ol.
