Aldaǵy 5 jylda aýyl turǵyndaryna 250 mlrd teńge somaǵa 50 myń mikrokredit berý josparlanǵan. Bul týraly búgin Úkimet otyrysynda QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Jalpy importty almastyrý aiasynda 2024 jylǵa deiin 19 qus fabrikasyn, jyl saiyn 35 taýarlyq sút fermasyn, 9 et kombinatyn iske qosý, sondai-aq Jambyl oblysynda
1 jańadan qant zaýyty qurylysy josparlanǵan. 6,6 myń gektar alańda jańa qarqyndy baq otyrǵyzý kózdelgen. Bul jobalardy engizý aýylda 20 myńǵa jýyq jumys ornyn qurýǵa múmkindik berdi», - dedi ministr.
Onyń atap ótýinshe, «Eńbek» baǵdarlamasy aiasynda aldaǵy bes jylda aýyldarda 250 mlrd teńge somaǵa 50 myń mikrokredit berý josparlanyp otyr.
«Atalǵan badarlama boiynsha ótken jyldyń ózinde osy maqsattarǵa 43,2 mlrd teńge baǵyttaldy. Bul 11 myńnan astam mikrokredit berýge múmkindik berdi. Onyń 60 paiyzyn startap-jobalar quraidy. Baǵdarlamany iske asyrý aýylda 11 myń turaqty jumys ornyn qurýǵa múmkindik berdi. Sondai-aq, «Sybaǵa» baǵdarlamasy boiynsha jeńildetilgen kredit berý aiasynda 2025 jylǵa deiin etti mal sharýashylyǵynda 175 mlrd teńge somasyna 2 500 sharýashylyqqa kredit berý josparlanýda, nátijesinde 10 myń jumys orny qurylady», - dedi Saparhan Omarov.
Ministrdiń dereginshe, qoi sharýashylyǵynda «Altyn asyq» baǵdarlamasy boiynsha 117,2 mlrd teńge somasyna 11 myń sharýashylyqqa kredit berý josparlanǵan. Bul 33 498 jumys ornyn qurýǵa múmkindik beredi.
«Keń Dala» baǵdarlamasy boiynsha jyl saiyn kóktemgi dala jáne egin jinaý jumystaryn júrgizýge 70 mlrd teńge kóleminde biýdjettik kredit bólinedi. Biyl 2 400 taýar óndirýshige 3 mln gektar alańǵa aýyl sharýashylyǵy daqyldaryn egý úshin jalpy somasy 70 mlrd teńge qysqa merzimdi kredit berý kózdelgen. Búgingi kúni baǵdarlama aiasynda 1 923 aýyl sharýashylyǵy eńbekkeri jalpy somasy 63,0 mlrd teńgege qarjylandyryldy», - dedi ol.
