Jambyl oblysynyń ákimi Berdibek Saparbaev Baizaq aýdanyndaǵy jarylys saldarynan búlingen úilerdiń qashan qalpyna keltiriletinin aitty, dep habarlaidy QazAqparat.
Jambyl oblysynyń Baizaq aýdanyndaǵy jaǵdaiǵa bailanysty qurylǵan oblystyq jedel shtabtyń músheleri arnaiy mamandarmen birge apattan zardap shekken 3 eldi mekendegi turǵyn úiler men áleýmettik nysandardyń ahýalyn zertteýde.
Oblys ákimi Berdibek Saparbaevtyń BAQ ókilderine bergen málimeti boiynsha, ázirge jóndeýdi qajet etetin 118 jyljymaityn múlik anyqtalǵan.
Onyń 106-sy - turǵyn úi, 12-si - kommertsiialyq nysan.
Jóndeýdi qajet etedi delingen 106 úidiń 35-ine kúrdeli jóndeý taǵaiyndalyp otyr. Oblystyq jedel shtab qalǵan 71 úidi jeńil zaqymdaldy dep tanyǵan.
«Olar da qalpyna keltiriledi. Barlyq jumystarǵa Úkimet tarapynan qaralatyn jáne jergilikti biýdjetten qosymsha bólinetin qarajat jumsalady. Óńirdegi demeýshiler de qarjylai kómek kórsetedi. Búgin bir úidiń kúrdeli jóndeý jumystary bastaldy. Qalǵan úilerde qurylysshylar erteńnen bastap iske kirisedi. Eki aidyń ishinde barlyq úilerdi qalpyna keltiremiz dep ózimizge mindetteme alyp otyrmyz. Oǵan bizdiń múmkindigimiz de, qurylysshylar kúshi de jetkilikti», - dedi oblys ákimi.
Eske salsaq, Memleket basshysy Qasym-Jomart Toqaevtyń tapsyrmasyn oryndaý aiasynda QR Premer-Ministri Asqar Maminniń ókimimen 26 tamyzda Jambyl oblysynyń Baizaq aýdanyndaǵy oq-dári qoimasynda oryn alǵan órt pen jarylys saldaryn joiý jónindegi Úkimettik komissiia quryldy.
QR Premer-Ministriniń orynbasary Roman Skliardyń tóraǵalyǵymen komissiia quramyna Jambyl oblysynyń ákimi Berdibek Saparbaev, qorǵanys ministri Nurlan Ermekbaev, tótenshe jaǵdailar ministri Iýrii Ilin, ishki ister ministriniń orynbasary Murat Baimuqashev, eńbek jáne halyqty áleýmettik qorǵaý, densaýlyq saqtaý, indýstriia jáne infraqurylymdyq damý jáne basqa da ortalyq memlekettik organdardyń vitse-ministrleri kirdi.
Komissiia aldyna zalaldy baǵalaý jáne órt pen jarylys saldaryn joiý, zaqymdalǵan infraqurylymdy qalpyna keltirý, sondai-aq zardap shekkenderge áleýmettik qoldaý sharalaryn kórsetý boiynsha mindetter qoiylyp otyr.
