QR Premer-Ministriniń orynbasary Berdibek Saparbaev bastaǵan Úkimettiń jumys toby Mańǵystaý oblysy Jańaózen qalasynyń turǵyndarymen kezdesti, dep habarlaidy QazAqparat.
Kezdesýge Mańǵystaý oblysynyń ákimi Serikbai Turymov, eńbek jáne áleýmettik qorǵaý ministri Birjan Nurymbetov, vitse-ministrler: bilim jáne ǵylym - Sholpan Karinova, densaýlyq saqtaý - Lázzat Aqtaeva, mádeniet jáne sport - Eldos Ramazanov, aqparat jáne qoǵamdyq damý - Daniia Esin, sonymen qatar kásipodaq fedratsiiasynyń tóraǵasy Eraly Tuǵjanov qatysty.
Vitse-premer sóz sóileý kezinde turǵyndardy Memleket basshysynyń azamattardyń ál-aýqatyn arttyrý, bilim berý, densaýlyq saqtaý, áleýmettik qorǵaý salalaryn damytýǵa arnalǵan tapsyrmasynyń júzege asý barysynan habardar etti.
Berdibek Saparbaev jańaózendikterdi memleketti, onyń ishinde «Eńbek» baǵdarlamasyn qoldap túrli sharalar uiymdastyrýǵa shaqyrdy.
«Birge jumys istep, qiyn máselelerdi sheshý, azamattardyń ómir sapasyn jaqsartyp, jumyspen qamtylýyn qadaǵalaý – bizdiń ortaq mindetimiz. Eger arnaiy mamandyǵy joq bolsa – «Eńbek» baǵdarlamasy boiynsha kásibi bilim alyp, kásipkerliktiń qyr-syryn úirenip, qaitarymsyz grant nemese jeńildikpen mikrokredit alýǵa bolady. Bastysy, bos otyrmaý kerek», - dep atap ótti Úkimet basshysynyń orynbasary.
Onyń aitýynsha, úkimet oblys ákimdigimen jáne «Atameken» UKP birigip Jańaózenniń eńbek naryǵyn zerttep, 2 myńǵa jýyq jumyssyz azamattar baryn anyqtaǵan.
«Biz olardy jumyspen qamtyp, granttar men mikronesieler bólip, kásipkerliktiń qyr-syryna úiretip, biliktiligin arttyryp, jańa jáne jumys istep turǵan kásiporyndarǵa jumysqa turǵyzýǵa niettimiz», - dedi Berdibek Saparbaev.
Vitse-premer sóz sóilegennen keiin kezdesý «erkin mikrofon» formatynda jalǵasyn taýyp, jańaózendikter ózderin alańdatqan suraqtardy qoidy.
Qala turǵyndary eńbekke tartý, kóshelerdi sapasyz tazalaý men kógaldandyrý, eski úilerdi buzý, turǵyn úi máselelerin sheshý, az qamtylǵan jáne kóp balaly otbasylardy qoldaý ortalyǵyn ashý syndy máselelerdi kóterdi. Barlyq suraqtarǵa tiisti jaýap berilip, túsiniktemeler aityldy.
19 jeltoqsan, beisenbi kúni Úkimettiń jumys toby Aqtaýdaǵy jumysyn jalǵastyryp, aimaq turǵyndarymen, densaýlyq saqtaý, bilim berý salasynyń qyzmetkerleri, jastarmen kezdesip, birqatar áleýmettik oshaqtardy aralaidy.
