QR Premer-Ministriniń orynbasary Berdibek Saparbaev jaqynda álem chempionattarynda ótken kúres, boks, aýyr atletika sport túrleri boiynsha ulttyq qurama komandalardyń kórsetken jarys qorytyndysy boiynsha keńes ótkizdi.
Bul týraly QR Úkimetiniń baspasóz qyzmeti habarlaidy.
Álem birinshilikterinde qazaqstandyq sportshylar boks boiynsha 1 altyn, 1 kúmis jáne 4 qola medal; kúres túrleri boiynsha 3 kúmis, 4 qola medal jáne aýyr atletika boiynsha 1 kúmis medal ielendi.
Jarystardyń qorytyndysy jáne Tokioda ótetin Olimpiada oiyndaryna daiyndyq týraly QR Mádeniet jáne sport vitse-ministri Eldos Ramazanov, Ulttyq Olimpiada komitetiniń hatshysy Sáken Musaibekov, Sport jáne dene shynyqtyrý isteri komitetiniń tóraǵasy Serik Sápiev, sondai-aq, ulttyq qurama komandalardyń bas bapkerleri baiandady.
E. Ramazanovtyń aitýynsha, búginde Qazaqstannyń qorjynynda 9 sport túri boiynsha 20 litsenziia bar, Olimpiadaǵa keminde 100 litsenziia jeńip alý josparlanǵan.
«Nátijeler kóńil kónishterlik emes. Boks boiynsha jalpykomandalyq úshinshi oryndy aldyq, aýyr atletika boiynsha – 12-shi, kúres boiynsha – 14-shi oryndamyz. Tek boksshylardyń jalǵyz altyn medali bar. Ministrlik, Ulttyq Olimpiada komiteti, federatsiialar men demeýshiler jetkilikti qoldaý kórsetip otyr. Onda nege nátije joq? Beiindi ministrlik bul jumysty durys úilestire almai otyr. Sport – bútin bir eldiń imidji. Tokioda ótetin Olimpiada oiyndarynda jaqsy nátijeler kórsetý úshin qatelermen jumys isteńizder. Ýaqyt az qaldy», - dedi B. Saparbaev.
Sonymen qatar vitse-premer sportshylardy jarystarǵa irikteý kezinde ashyqtyq pen obektivtiliktiń jetispeitinin aitty.
«Sportta jeń ushynan jalǵasý, alalaý eshqashan bolmaýy tiis! Bizdiń elimizdiń abyroiyn úzdik sportshylar qorǵaýy kerek. Buqaralyq sportty damytyp, kásibi sportshylardyń jas urpaǵyn daiyndaý kerek. Bizdiń materialdyq-tehnikalyq bazamyz jaqsy, sondyqtan, ásirese, óńirlerde sporttyq qurylymdardy barynsha tiimdi paidalaný qajet», — dep túiindedi ol.
