QR Premer-Ministriniń orynbasary Berdibek Saparbaev pen QR Eńbek jáne halyqty áleýmettik qorǵaý ministri Birjan Nurymbetov Memleket basshysynyń tapsyrmasymen elordanyń Halyqty jumyspen qamtý ortalyǵynda jáne aýdandyq ákimdikterindegi jumyspen qamtý bólimderinde bolyp, jańa formattaǵy ataýly áleýmettik kómek taǵaiyndaý úshin qujattardy qabyldaý barysymen tanysty, dep habarlaidy "Ult aqparat".
Qazaqstan Respýblikasy Premer-Ministriniń orynbasary jáne Eńbekmininiń basshysy birinshi kezekte «bir tereze» qaǵidaty negizinde 70-ten astam qyzmet túrlerin usynatyn Januia otbasylyq qoldaý ortalyǵynda boldy. Osydan keiin olar Halyqty jumyspen qamtý ortalyǵy men elordanyń aýdandyq ákimdikterindegi jumyspen qamtý bólimderiniń jumysymen tanysty, munda Nur-Sultan turǵyndary AÁK taǵaiyndaý úshin qujattar tapsyra alady.
«Azamattarǵa AÁK jáne kópbalaly otbasylarǵa járdemaqy taǵaiyndaý erejelerin túsindirý qajet jáne barynsha qolaily jaǵdai jasaý kerek. Eger adamdarda qosymsha suraqtar týyndasa, basqa memlekettik organdardan mamandardy tartý jáne sol jerde osy máselelerdi sheshý qajet. Eshqandai tolqý bolmaýy kerek», – dep tapsyrdy Saparbaev.
«Januia» ortalyǵynyń, Halyqty jumyspen qamtý ortalyǵy men jumyspen qamtý bólimderiniń qyzmetkerleri qujattardy qabyldaý jumystary ádettegidei júrip jatqanyn habarlady. Halyq tarapynan eshqandai tolqý joq.
Jergilikti atqarýshy organdardyń aqparaty boiynsha, elimizdiń basqa óńirlerinde Halyqty jumyspen qamtý ortalyǵynda AÁK resimdeýge niet bildirgen azamattardyń kóp kelýi baiqalmaidy.
«AÁK taǵaiyndaýǵa ótinish bildirgen qazaqstandyqtar jańa jyldyq merekelerden keiin dereý jumyspen qamtý ortalyqtarynda qujattar tapsyrýǵa jáne kezekke turýǵa ýaqyt jetpeidi dep alańdamaýy kerek. Ótken jyldyń jeltoqsan aiynda eldiń barlyq óńirlerinde AÁK tólemderi aldyn ala júzege asyryldy, ony azamattar qańtarda alýy tiis. Endi osy aidyń ishinde adamdar qujattardy ońai tapsyra alady. AÁK taǵaiyndaý kriteriilerine sáikes keletinderdiń barlyǵyna qańtar jáne aqpan ailary úshin tólemder tólenedi», - dedi Birjan Nurymbetov.
Sondai-aq, Berdibek Saparbaev Halyqqa qyzmet kórsetý ortalyǵyna bardy.
Esterińizge sala keteiik, 2020 jyldyń 1 qańtarynan bastap Qazaqstanda áleýmettik kómek kórsetýdiń jańa tásilderi engizildi, olar: ataýly áleýmettik kómekti ár toqsan saiyn taǵaiyndaý; AÁK taǵaiyndaýdyń buryn qoldanystaǵy shekti ólshemin saqtaý - otbasynyń ár múshesine shaqqandaǵy ortasha kiris kúnkóris deńgeiiniń 70%-ynan kem bolýy kerek; otbasynyń barlyq músheleri úshin AÁK mólsherin jan basyna shaqqandaǵy kiris pen kedeilik sheginiń arasyndaǵy aiyrma retinde anyqtaý; ýchaskelik komissiialardyń osy protsestegi rólin arttyrýmen otbasynyń materialdyq jaǵdaiyna zertteý júrgizý merzimin 3 kúnnen 7 kúnge deiin ulǵaitý.
Sonymen qatar, AÁK alatyn otbasylardyń balalary kepildik berilgen áleýmettik toptamaǵa ie bolady.
Sonymen, 1 jastan 6 jasqa deiingi tabysy az otbasylardyń balalary azyq – túlik jiyntyǵymen jáne gigienalyq quraldarmen, 6 jastan 18 jasqa deiingi balalar mektepterde ystyq tamaqpen, oqý quraldarymen jáne mektep kiimderimen qamtamasyz etiledi, sondai-aq olarǵa mektepke deiingi jol júrý shyǵyndary óteletin bolady. Meditsinalyq, onyń ishinde stomatologiialyq kómek 18 jasqa deiingi balalarǵa tegin meditsinalyq kómektiń kepildik berilgen kólemi jáne mindetti áleýmettik meditsinalyq saqtandyrý sheńberinde kórsetiledi.
