Jambyl oblysy ákimdiginde Qazaqstan Respýblikasy Parlamenti Májilisiniń jáne máslihattar depýtattaryn sailaý máseleleri boiynsha oblystyq shtabtyń otyrysy ótti, - dep habarlaidy "Ult aqparat".
Kezdesýde Jambyl oblysynyń ákimi Berdibek Saparbaev aldaǵy máslihattar sailaýy alǵash ret partiialyq tizim boiynsha ótkeli otyrǵandyǵyn atap ótti.
Oblystyq aýmaqtyq sailaý komissiiasynyń tóraǵasy Serǵali Aidapkelovtiń aitýynsha, barlyq deńgeidegi máslihattar úshin 51 partiialyq tizim anyqtalyp, oǵan 523 kandidat engen. Úmitkerlerdiń jalpy sanynyń 43,8 paiyzyn názik jandar men 29 jasqa deiingi jastar quraidy. S.Aidapkelov jekelegen sailaý rásimderine, atap aiqanda úmitkerlerdi usyný jáne tirkeý, sailaýaldy úgit-nasihat jumystarynyń merzimine toqtalyp ótti.
«Máslihattarǵa kandidattardy usyný 10 jeltoqsan kúni saǵat 18:00-de aiaqtalady. Sol kúni saǵat 18:00-den keiin úgit-nasihat naýqany bastalady, ol 2021 jyly 9 qańtar kúni saǵat 12-de aiaqtalady. Aýdandarda azamattardyń sailaý quqyqtaryn, sailaý naýqanynyń negizgi kezeńderin túsindiretin, daýys berýge qatysýǵa shaqyratyn bilbordtar, bannerler ornatý qajet dep sanaimyn», — dep atap ótti ol.
Óńir basshysy aýdan ákimderine tiisti tapsyrmany júktedi. Ol bul aqparattardyń baspa buqaralyq aqparat quraladary betterinde jáne internet jelilerinde de jariialaný kerektigin alǵa tartty. Berdibek Saparbaev aýdan ákimderiniń sailaýǵa daiyndyq jumystaryn synǵa aldy.
«Sailaýshylardyń tizimi tolyǵymen qalyptaspaǵan. Jergilikti jerlerde túgendeý jumystaryn júrgizý kerek», — dep talap etti oblys ákimi.
Taǵy bir mańyzdy másele – sailaý ýchaskeleriniń materialdyq-tehnikalyq bazasy. Taraz jáne birqatar aýdanda ýchaskelerdiń bári birdei internetpen, beinebaqylaý kameralarymen, pandýstarmen qamtylmaǵan.
«Eger oblys ortalyǵyndaǵy sailaý ýchaskeleri 100% daiyn bolmasa, onda aýdandar týraly ne aitýǵa bolady? Úsh jaǵdai boiynsha da Qordai aýdany artta qalyp otyr. Shý jáne T.Rysqulov aýdandaryndaǵy jaǵdai da kóńil kónshitpeidi. Barynsha qysqa ýaqytta osy olqylyqtardyń barlyǵyn joiý qajet jáne múmkindigi shekteýli jambyldyqtardyń sailaý quqyǵyn qamtamasyz etýge erekshe nazar aýdarý kerek», - dep buiyrdy aimaq basshysy.
Jambyl oblysy boiynsha sanitarlyq-epidemiologiialyq baqylaý departamenti basshysynyń mindetin atqarýshy Neilia Mýlikova qazir sailaý ýchaskeleriniń sanitarlyq talaptarǵa sáikestigi tekserilip jatqandyǵyn aitty.
«Karantin shekteýleri azamattardyń el Konstitýtsiiasynda kepildendirilgen daýys berý quqyǵyn júzege asyrýyna kedergi bolmaýy tiis. Degenmen sailaýshylar, komissiia músheleri men baqylaýshylar sanitarlyq normalardy qatań saqtaýy kerek. Ol úshin aýdandarda qajetti jaǵdailar jasalynýy qajet», — dedi oblys ákimi.
Sondai-aq, shtab músheleri ár sailaý ýchaskesinde meditsinalyq beketter ashý, em alyp jatqan naýqastardyń daýys berýine qatysty máselelerdi talqylady. Politsiia departamentiniń bastyǵy Janat Súleimenov sailaý kezinde myńnan astam politsei zańdylyq pen tártiptiń saqtalýyn qamtamasyz etetinin jetkizdi.
