Eńbek jáne halyqty áleýmettik qorǵaý ministri Berdibek Saparbaev turmysy tómen azamattardyń tizimi qalai jasalatynyn túsindirdi. Sol boiynsha banktegi kredittiń bir bóligi óteledi, dep habarlaidy Sputnik Qazaqstan.
"Ministrlikke naqty mindet júkteldi. Biz osy boryshkerlerdiń kategoriiasyn anyqtaýymyz qajet. Qazirgi tańda alty sanat anyqtaldy. Ol – kópbalaly, asyraýshysynan aiyrylǵan, jetim balalar, ataýly kómek alatyndar. Barlyǵynyń málimetteri men tizimi ministrlikte bar. Jetim balalarǵa qatysty málimetti bilim ministrligi beredi. Solardan ony da alamyz", - dedi Saparbaev májilistiń jalpy otyrysynda.
Ministrdiń aitýynsha, bankter men mikroqarjylandyrý uiymdary óz kezeginde boryshkerlerdiń tizimin jasaidy da, memlekettik nesie biýrosyna jiberedi. Biýro ol tizimdi qorǵa beredi. Al qor óz kezeginde ministrlikke usynady.
"Biz ol tizimdi taǵy tekseremiz. Sebebi ministrlik osy baǵdarlamanyń ákimshisi bolyp sanalady. Jańaǵy aitylǵan 88 milliard teńge bizdiń ministrligimiz arqyly ótedi. Biz tizimdi teksergennen keiin ol aqshany qorǵa aýdaramyz. Qor ary qarai ekinshi deńgeili bankter men mikroqarjylandyrý uiymdaryna aýdarady. Barlyq málimet bar. Biz ol aqshanyń durys tólengenin baqylap otyramyz", - dedi Saparbaev.
Toqaevtyń tapsyrmasy
Aita keteiik, prezidenttiń tapsyrmasy boiynsha kepilsiz kredit alǵan 5 millionǵa jýyq adamnyń aiyppuldary men ósimaqylary óteledi. Al turmysy tómen azamattar úshin osyndai jeńildikpen birge 300 myń teńgege deiingi qaryz somasy keshiriledi. Biraq kredittiń somasy 3 million teńgeden aspaýy qajet.
Turmysy tómen azamattardyń qataryna kópbalaly otbasylar, múgedek balasy bar otbasylar, asyraýshysynan aiyrylǵandar, jetim balalar jáne ataýly áleýmettik kómek alatyndar jatady. Parlament májilisi tiisti zań jobasyn maquldady, endi ony senatta qaraidy.
