QR Eńbek jáne halyqty áleýmettik qorǵaý ministri Berdibek Saparbaev «Qarashyǵanaq Petroliým Opereiting B.V» kompaniiasynyń Bas direktory Edvin Blommen kezdesti, dep habarlaidy "Ult aqparat" ministrliktiń baspasóz qyzmetine silteme jasap.
Kezdesý barysynda taraptar kásiporynda eńbek zańnamasynyń saqtalýy, sonyń ishinde sheteldik mamandardy tartý, sondai-aq kásiporynnyń kópbalaly jáne az qamtylǵan qyzmetkerlerine qoldaý kórsetý máselelerin talqylady.
Berdibek Saparbaev «Qarashyǵanaq Petroliým Opereiting B. V» kompaniiasynyń áleýmettik baǵdaryn jáne elde júzege asyrylyp jatqan barlyq áleýmettik jobalarǵa belsendi qatysýyn erekshe atap ótip, Batys Qazaqstan oblysy turǵyndarynyń ómir súrý sapasyn jaqsartýǵa qosqan úlesin joǵary baǵalady.
Sondai-aq, ol eńbek zańnamasyn saqtaý boiynsha júrgizilip jatqan jumystarǵa oń baǵa berdi. Vedomstvo basshysy kompaniiany kópbalaly jáne az qamtylǵan otbasylardyń áleýmettik qorǵalýyna erekshe kóńil bóle otyryp, merdigerlik uiymdardyń eńbek ujymdaryndaǵy jaǵdaidy baqylaýdy kúsheitýge shaqyrdy.
«Ózderińizge belgili, búgingi tańda Qazaqstanda joǵary bilikti, sonyń ishinde 3 jáne 4 sanattaǵy mamandar daiarlanýda. Sondyqtan Qazaqstanda joq mamandar bolmasa, búgingi tańda sheteldik jumys kúshin kóptep tartýdyń qajettiligi joq. Sonymen qatar, Elbasy men Prezidenttiń tapsyrmalary aiasynda qyzmetkerlerdiń eńbekaqysyn infliatsiia deńgeiin eskere otyryp, jyl saiyn arttyrýǵa erekshe nazar aýdarý jáne jumysshylardyń negizsiz qysqarýyna jol bermeý qajet», - dep atap ótti Saparbaev.
Edvin Blomnyń málimetinshe, kompaniianyń barlyq salasy boiynsha jyl saiyn jalaqy monitoringi júrgizilip otyrady. Osylaisha, búgingi kúni kásiporyn qyzmetkerleriniń jalaqysy Batys Qazaqstan oblysy boiynsha ortasha jalaqydan 3,3 ese joǵary.
«Kásiporynnyń barlyq qyzmetkerleri úshin teń jáne ádil eńbek jaǵdailary saqtalǵan. Kompaniia basshylyǵy men qyzmetkerler arasyndaǵy turaqty dialog múmkindigi ujymdyq shart negizinde qamtamasyz etiledi. Osyǵan uqsas talaptar merdigerlik uiymdarǵa da qoiylatynyn atap ótý kerek. Biz olardyń ishki jaǵdaiyn, sonyń ishinde eńbek zańnamasynyń saqtalýyn jospardan tys tekserýler júrgizý arqyly únemi baqylap otyramyz», - dedi E.Blom.
