Berdibek Saparbaev Úkimetten kóterme-saýda ortalyǵy birinshi kezekte salynatyn oblystardyń qataryna ózi basqaryp otyrǵan Jambyl óńirin de qosýdy surady, dep habarlaidy QazAqparat.
Aita ketsek, Úkimet otyrysynda Saýda jáne integratsiia ministri Baqyt Sultanov biyl Almaty, Pavlodar jáne Túrkistan oblystarynda aýyl sharýashylyǵy taýarlaryn saqtaýǵa arnalǵan 5 kóterme-taratý ortalyǵyn salý kózdelip otyrǵanyn málim etken edi. Óz kezeginde Jambyl oblysynyń ákimi Berdibek Saparbaev Úkimet basshysyna ótinish bildirdi.
«Jambyl oblysy búkil Qazaqstanda piiaz, qant, tomat jáne qarbyzben qamtamasyz ete alady. Ekinshiden logistika jóninen biz Batys Qytai – Batys Eýropa jolynyń boiynda turmyz. Bizdiń bir jaǵymyzda - Bishkek, ekinshi jaǵymyzda - Almaty, Shymkent pen Nur-Sultan qalalary tur. Ministrlikke kóterme-taratý ortalyǵy boiynsha 20 jáne 12 gektarlyq eki jer ýchaskesin usyndyq. Tolyq infraqurylymmen qamtamasyz etilgen. Qazirgi tańda qoimamen qamtamasyz etý deńgeii 85 paiyz ǵana bolyp otyr. Sonyń saldarynan ósirilip jatqan ónimderdi satý bizge kúrdeli bolyp tur», - dedi Úkimet otyrysyna onlain-rejimde qosylǵan Berdibek Saparbaev.
Aimaq basshysy osy sebepti kóterme-saýda ortalyǵy birinshi kezekte salynatyn oblystardyń qataryna Jambyl óńirin qosýdy surady.
«Saýda jáne integratsiia ministrligine tapsyrma berseńiz birigip osy máseleni pysyqtasaq dep edik», - dedi ol.
Óz tarapynan Premer-ministr kóterme-saýda ortalyǵy birinshi kezekte salynatyn oblystardyń ishine Jambyl óńirin de qosý máselesi qarastyrylatynyn jetkizdi.
