Jambyl oblysynyń ákimi Berdibek Saparbaev Qordai aýdanyndaǵy tártipsizdikterge qatysy bar degen kúdikpen ustalǵandardyń ata-analary jáne týystarymen kezekti ret kezdesti, dep habarlaidy "Ult aqparat".
Aimaq basshysy Qarakemer jáne Sortóbe aýyldarynda jergilikti turǵyndarmen birqatar kezdesýler ótkizdi.
Berdibek Saparbaev ustalǵandardyń týystarynyń barlyq ótinishterin muqiiat tyńdap, olardyń eshqaisysy nazardan tys qalmaitynyn jáne prokýratýra, quqyq qorǵaý jáne jergilikti atqarýshy organdarmen qaralatynyn atap aitty. Ol barlyq ózekti máseleler Qazaqstan zańnamasy aiasynda sheshilýi tiis ekendigin atap ótti.
«Biz bolǵan qaiǵyly oqiǵalar 11 adamnyń ólimine ákelip soqtyrǵanyn, eki júzge jýyq adam jaraqat alǵanyn, azamattarymyzdyń múlki zardap shekkenin umytpaýymyz kerek. Sizderdiń barlyq ótinishterińiz qaralady, ustalǵandarmen kezdesýler men telefon arqyly sóilesýler uiymdastyrylady. Quqyq qorǵaý organdary tergeý jumystaryn aiaqtady, ol materialdarmen taraptar tanystyrylýy kerek. Zańdy buzǵan jáne olardyń kinási dáleldengen adamdardyń bári jazalanýy qajet ekenin taǵy da aitqym keledi. Barlyǵy zań boiynsha bolýy kerek. Bul másele Memleket basshysy Qasym-Jomart Toqaevtyń jeke baqylaýynda», - dep atap ótti Saparbaev.
Sonymen qatar, oblys ákimi jergilikti turǵyndarmen bolǵan áńgime barysynda memleket tarapynan qomaqty qarajat bólinip, jergilikti atqarýshy organdar Qordai aýdanyndaǵy eldi mekenderdi damytý baǵytynda aýqymdy jumystar atqaryp jatqandyǵyn atap ótti.
Máselen, Qarakemer jáne Masanshy aýyldaryndaǵy áleýmettik nysandardy abattandyrý men salý úshin qosymsha 3 milliard teńge bólingen. Turǵyn úiler, sport jáne balalar alańdary, dárigerlik ambýlatoriia, mektep, kósheler salynyp, gaz qubyry, sýmen jabdyqtaý jelileri tartylyp jatyr.
Júzdesý sońynda aimaq basshysy tártip pen zańdylyqty saqtaýǵa, túrli arandatýshylyqtar men jalǵan aqparatqa boi aldyrmaýǵa shaqyrdy.
