Ár qazaqstandyq, eger ol jumys istese, jaǵdaiy jaman bolmaitynyn túsinýi kerek. Bul týraly Eńbek jáne halyqty áleýmettik qorǵaý ministri Berdibek Saparbaev aitty, dep habarlaidy Sputnik Qazaqstan.
"Eń úlken máseleniń biri – halyqty jumyspen qamtamasyz etý. Árbir qazaqstandyq, eger ol jumys istese, onyń jaǵdaiy jaman bolmaitynyn túsinýi kerek. Jańa kórmeden kórdińizder, múmkindigi shekteýli azamattar 1-3 million teńge kredit alyp, kásip ashyp, ózinen basqa jeti-segiz adamdy asyrap otyr. Sondyqtan, ómirimizdiń jaqsy bolýy ózimizge bailanysty. Ásirese, on eki múshesi saý adamdar", - dedi Saparbaev halyqqa esep berý kezdesýinde.
Ministr qazir Qazaqstanda eń tómengi jalaqy mólsheri 42 500 teńge quraitynyn atap ótti. Buǵan qosa, 1 qańtardan bastap jalaqysy tómen azamattardyń eńbekaqysy kóterilgenin, prezidenttiń tapsyrmasyna sáikes, 1 maýsymnan bastap densaýlyq, bilim, mádeniet jáne sport, áleýmettik qamsyzdandyrý salalarynda isteitin ailyǵy az qyzmetkerlerdiń jalaqysy óskenin eske saldy.
"Munyń bárine biýdjetten aqsha qaralǵan. Bizdiń esebimizshe, 1 maýsymnan bastap bul sharamen keminde 1 million 100 myń azamat qamtylady", - dedi ol.
Sondai-aq, Saparbaev ministrlik halyqty jumyspen qamtý máselesine basa nazar aýdaryp otyrǵanyn aitty.
"Qazir biz túsinemiz ǵoi, kóp eńbek etsek, kóp jalaqy alamyz, problema da az bolady. Eń bastysy, qazaqstandyqtardy jumyspen qamtý. Bul úshin respýblikada "Eńbek" memlekettik baǵdarlamasy júzege asyrylyp keledi. Byltyr bul baǵdarlama aiasynda 571 myń qazaqstandyq qamtylýy tiis edi, biraq 628 myń azamat qamtyldy. Biýdjetten 107 milliard teńge bólinip, sonyń shamamen 99 protsenti igerildi", - dedi ministr.
Buǵan qosa, onyń aitýynsha, mikrokreditter men granttar sanyn ulǵaitý josparlanyp otyr
